Shillong, Nohprah, 03: Ka Hynñiewtrep Youth Council (HYC) ka la kyntu ïa ka Sorkar Meghalaya ban bishar thymmai biang ïa ki nonghikai Lower Primary (LP) kiba la shah thoh “dak iong” ha ka jingthungkam nonghikai ha u snem 2008-09 hadien ba ka ïingbishar Meghalaya High Court ka la pynmih ïa ka rai kaba sait khuid ïa baroh ki jingkynnoh leh bymhok ha ka jyrsieh thungkam ‘tah sia lieh.”
Ha ka dorkhas ba la phah sha u Myntri Rangbah ka Jylla u Conrad K. Sangma ha ka sngi Balang, ka Hynñiewtrep Youths Council (HYV) ka la dawa ïa ka Sorkar Meghalaya ba shimkhia ïa ka rai jong ka Iingbishar Meghalaya High Court kaba la pynmih ha u bnai Nailar, 2025.
Ban pynmih ïa ka jingpynbna ba thikna kaba pynshai hato ïa ka ‘dak iong” ba la tah ha ki katto katne ki nonghikai/ki kyrtong ha kaba ïadei bad ka jingpynrungkam ha u snem 2008–09 mynta yn sa bishar bniah ne weng noh hadien ka rai jong ka Iingbishar High Court kaba la pyllait ïa ki briew na ka jingshah kynnoh.
Ban bthah ïa ka tnad Pule Puthi ba kan bishar bniah ïa baroh ki case “dak iong” kiba mih na ka jingthungkam ha u snem 2008–09.
Ka HYC ka la dawa ïa ka Sorkar ban thaw da ka Review & Re-instatement Committee hapoh ka Directorate of School Education & Literacy, ban bishar lut ïa kine ki case ha ka por kaba biang khnang ba pynïoh biang ïa ka burom, bad ka kamai jakpoh, bad ka jingkyrmen na ka bynta kito kiba la shah pynshitom bym hok.
“Ngi ngeit ba ka rai jong ka iingbishar ka dei hok ban bishar bniah biang ïa ka jingshah tah ‘dak iong’ bad ngi kyrpad ïa ka Sorkar ban ai jingpynshai halor kane ka mat, na ka bynta ka hok, ka jinglong hok, ka jingtreikam kaba khuid bad na ka bynta ka bha ka miat jong kito kiba dei hok kiba dang mad ïa ka jingsuhsat haduh mynta,” la ong ka Seng.
“Da kaba shaniah ïa ka jingsngewkhia jong phi na ka bynta ka hok, ka jingïaryngkat bad ka bha ka miat jong ki nonghikai kiba shah ktah, ngi kyrmen ba yn shim ïa ki lad ki lynti ban beit noh mardor,” la ong shuh shuh ka Seng.
