Shillong, Nohprah, 03: Ka Kashari u Chief Judicial Magistrate, ka Khliehriat, East Jaiñtia Hills District u Bah A. W. Lanong ka la pynksan ïa ki nongïalam jong ka Meghalaya People United Front san snem hadien ba ki la shah pynngat mukotduma ha u snem 2019 ha ki Pulit jong ka East Jaiñtia Hills District hapoh ka Section 468/471 jong ka Indian Penal Code 1860 bad ka Section 11 jong ka Prevention of Cruelty to Animals Act, 1960.
Ki 6 ngut ki nongïalam ka MPUF kiba la shah mudui ejahar ha ki Pulit ka Lad Rymbai Out Post ki kynthup ïa u Bah Viki Dkhar, u Bah Thawlad Lyngdoh, u Bah Kyrshan Blah, u Bah Micheal Chyrmang (uba la pynïasoh noh mynta sha ka FKJGP) u President ka MPUF u Bah Dawanpoimi Laloo bad u nongñiah kali u Bah Albert Marngar.
Ka Kashari ka la pynmih ïa ka hukum kaba pynksan ïa ki nongïalam ka MPUF ha ka 12 tarik, Naiwieng, 2025.
U President jong ka seng u Bah D. Wanmi Laloo ha ka jingïakren bad ki lad pathai khubor ha nongbah Shillong ha ka sngi Balang u la ong, “ngi ai khublei ïa u muktiar u Bah D. Pashiang bad ïa ki nongïatreilang kiba la trei shitom ban pynïoh ïa ngi ïa ka hok. Ngi ai khublei ïa ka Kashari kaba la ai ïa ka jingbishar kaba hok.”
Haba ïathuh bniah ïa ka jingshah mudui ejahar ha ki Pulit ka Lad Rymbai Out Post u Bah Laloo u la ong, “ngim tip ha kano ka rukom ki (Pulit) register case pyrshah ïa ngi. Hynriew snem ba ngi la ïaid lynti bad kane ka mukotduma ngi la shem bun ki jingeh. Ngi don ka jingkyrmen ba ka Kashari kan ai ïa ka hok bad ngi la ïoh ïa ka hok.”
“Ka jingmih shakhmat ban pynpaw paidbah ïa kane ka long namarba ngi sngewdei ba ki paidbah ki hap ban tip ïa ka hok jong ki. Lada ïa ngi ki nongïalam ki Pulit ki lah ban ujor da ka mukotduma, katno tam ïa ki paidbah ki bym nang ban ïaleh case. Kane ka long kum ka jingpynshai paidbah. Ym dei ba ngi don daw shimet ïano ïano bad ki Pulit namarba ngi don shibun ki paralok Pulit kiba ngi ïatreilang na ka por sha ka por, hynrei ki don pat ki Pulit kiba shim kabu ïa ka Uniform ba ki phong da kaba pyndik ïa ki paidbah,” u la ong.
“Kum ka seng ngi pynshai bad kan long ruh ka jingmaham ïa kito Pulit kiba shim kabu ïa ka aiñ bad ban pynshitom ïa ki briew jong ngi ha ki rukom bapher bapher la ka long ha kino kino ki bynta. Ngi la jop ïa kane ka case bad ngi kwah ban pyntip ïa ki paidbah lada phi ïa kynduh ïa kum kine ki jingeh phim dei ban tieng hynrei phi dei ban ïaid katkum ki kyndon jong ka aiñ bad ka don hi ka Iingbishar kaba bishar ha kaba ïadei bad kine ki bynta” u la ong.
Haba kylli, u Bah Laloo, u la ong “katkum ka ejahar ba la ujor da u Officer Incharge ka Ladrymbai Out Post la shu kdew ha ka ejahar ba ka dei tang ka jingsuba. Katba ha ka jingbishar jong ka Kashari ka la shem ba kam don ka jingshisha hynrei la shu register case khlem da ïaid katkum ki kyndon jong ka aiñ. Ka Kashari ka la lap ba ki don ki jingduna ha kane ka mukotduma bad ka la pyllait noh ïa ngi.”
U la ong ruh ba ka seng kan sa ïasyllok shwa bad ki nongsaidaiñ kumno ban leh nangne shakhmat.
U la ïathuh shuh shuh ka jingpynngat kyndon jong ki Pulit ha ka Section 468/471 kaba kdew shaphang ka jingsoi tuh bad ka jinglehbeiñ ïa ki mrad.
Haba kylli, u la ong, “ha kato ka sngi ki la don ki nongñiah trok kiba pyntip ïa ngi ba ki don ki Pulit kiba bat ïa ki kali jong ki ha lynti. Kum ki nongïalam sengbhalang ngi don ka hok ban leit tohkit bad ynda ngi la ïakynduh ïa ki nongniah trok ki la pyni ha ngi ïa ki Challan kiba ngi ïohi kumba ki dei kiba shisha. Ngi leit rah ïa ki Challan ha Out Post ban ïakren ïa ki Pulit ba balei phi bat ïa ki kali haba ki don ïa ki Challan kiba shisha. Lada ki dei kiba thok, ki Pulit ki ladei ban pynshisha shwa hynrei kim shym la pynshisha ïa ki Challan kaba pynlyngngoh ïa ngi.”
