Shillong, Nohprah, 03: Ka Sorkar Jylla ka la pyntip ba kan sa pynap noh da ki ksew sma jong ka K-9 Unit kum shi bynta ka jingpyntreikam ïa ka Drug Reduction, Elimination and Action Mission (DREAM) ban ïarap ïa ki Pulit ka Anti Narcotic Task Force (ANTF) ka jylla ba kin sma ïa ki kali kiba rung na ka khyrdop ha ka shnong Ratacherra, East Jaiñtia Hills District khnang ban ïohkem ïa kino kino ki snar khaii kiba pynrung ïa u drok shapoh ka jylla Meghalaya.
U Adviser jong ka tnat Social Welfare u Bah Paul Lyngdoh ha ka jingïakren bad ki lad pathai khubor ha ka sngi Balang u la ïathuh ba ka Sorkar ka la ïoh ïa ka mang pisa ban thied ïa ki Vehicle Scanner khnang ban lap ïa ki nongkhaii drok bad kiwei kiwei ki jingdih pynbuaid.
Ïa ki ksew ka K-9 Unit la pyllait paidbah da u Myntri Rangbah ka Jylla u Conrad K. Sangma ha ka International Day of Persons with Disabilities 2025 ba la pynlong da ka State Commisioner for Persons with Disabilities, ka tnat Social Welfare, ka Sorkar Jylla ha ryngkat ka jingïatreilang bad ka State Resource Centre on Disabilities Affairs.
“Kumba ngi la kular ha u snem baladep, mynta ka sngi ngi la ïoh ïa ki ksew ka K-9 Squad ki ban ap ha ki Entry Point, khamtam, ha ka shnong Ratacherra, ban khanglad ïa ka jingpyrshang ban pynrung ïa u drok bad ïa ki jingdih pynbuaid sha ka Jylla Meghalaya,” u la ong.
