Shillong, Nohprah, 04: Ka ophis u District Transports Officer ka East Khasi Hills District bad Secretary ka Regional Transport Authority, East Khasi Hills, Shillong ka la kyntait ban mynjur ïa ka aplikeshon ba la phah da ki bor pynïaid jong ka JETS 24×7 kaba pan permit na ka bynta ban pynkamai sa 45 tylli ki Bike Taxi.
Ha ka shithi ba la phah da u Secretary ka Regional Transport Authority, East Khasi Hills, Shillong u Bah R. Hinge sha ki bor pynïaid jong ka JETS 24×7 ha ka 1 tarik Nohprah, 2025, la pynpaw ba ka RTA Board ha ka jingïalang kaba la long ha ka 22 tarik, Risaw, 2024 ka la ai jingmynjur ban ai 54 tylli ki permit sha ki riewshimet kiba aplai lyngba ka JETS 24×7 bad la pyntip ba mynta ka JETS 24×7 ka la pan tang 15 tylli ki permiet na ka bynta ki Bike Taxi na ka Allotment Order ba la mynjur da ka Board.
Ka Regional Transport Authority, ka la pan jingpynshai ruh na ki bor pynïaid jong ka JETS 24×7 ba balei kam shym la aplai ïa ka permit na ka bynta ki 42 tylli wat hadien ba la ai ïa ka Allotment Order bad ha kajuh ka por ka Regional Transport Authority, ka la pan jubab ruh na ki bor pynïaid ka JETS 24×7 hapoh 15 sngi.
Haba jubab ïa ka shithi jong ka Regional Transport Authority ha ka 3 tarik Nohprah, 2025, u Managing Director jong ka JETS 24×7 u Bah Pynskhemlang W. Uriah, u la kdew ba ka jingdon jong ki Rapido ba shu kamai beaiñ kaba pynshlur ïa ki riewshimet ban kamai khlem permit, khlem ka police verification bad kiwei kiwei ka long kum ka rynsan kaba ban kamai da ki bike taxi kaba buh ïa ki paidbah ha ka jingma bad ka pynduh mynsiem ruh ïa kiwei kiba don ïa ka jingthmu kaba bha ban aplai ïa ka Commercial Permit jong ka Sorkar.
Ka JETS 24×7 ka la kdew ruh ba ka rukom ai bym ryntih ïa ki Allotment Order da ka Board jong ka Regional Transports Authority, ïa kaba la ai khatduh eh 13 bnai mynshwa katkum u bnai Naiwieng, 2025 bad ka pynpaw ba kam don kano kano ka dak ban ai wat ïa ki Allotment Order ban sa wan.
Shuh shuh ka JETS 24×7 ka la kynnoh ruh ba ka jingduna jong ka tnat ka Sorkar Meghalaya ban pynsuk ïa ki nongaplai kiba kwah ban aplai ïa ka permit kum kaba pynsuk ïa ki nongaplai kiba kwah ban aplai kiba wan shakhmat ban aplai ïa ka permit, kum ka jingpynsuk ïa ka rukom aplai bad ka jingai jingïarap ïa ka bai aplai, bai ai jingbit, bad kiwei kiwei.
Ka JETS 24×7 ka la pynpaw ba ha ki por ba ladep ka la pyrshang ban pynpaw ïa ki jingeh la ka long ha ki jingïakren bad da ki jingthoh khamtam ha kaba ïadei bad ka jingmih ka company beaiñ (Rapido) kaba treikam laitlan khlem ka jingshah pynshitom kaba long kum ka jingrkhie bein ïa ka shongsuk shongsaiñ ha ka jylla Meghalaya.
Ka JETS 24×7 ka la ong shuh shuh ka jingbym don ki sienjam kiba pynhun na ka tnad jong phi kan pynbor ïa ngi ban shim ïa ka rai kaba tyngeh khnang ban ïada ïa ka hok jong ngi kaba la shah pynkhein la 34 bnai bad kaba dang ïai bteng.
