Shillong, Nohprah, 04: Ka Jaiñtia National Council (JNC–CEC), ha ka sngi Palei ka la da ai da ka jingujor sha ka Commissioner & Secretary ka tnat Revenue and Disaster Management ka Kong Matsiewdor War Nongbri halor ka jingkynnoh ba ka don jingthied jaka na ka bynta ka Shree Cement Project Limited ban shna ïa ka M/S Shree Cement Integrated ha ka shnong Daistong, East Jaiñtia Hills District.
Ha ka dorkhas, ka JNC ka la pynpaw ba ka jingpynkylla beaiñ ïa ki jaka riewlum ka long kum ka jingpynkhein ïa ka aiñ Meghalaya transfer of Land Regulation, 1971.
Ka seng ka la pyntip ba ka jaka ka dei jong uwei u trai jaka riewlum u Bah Syrpaibha Sukhlaiñ bad la thied da u Bharat Sharma, u bym dei u riewlum. “Kane ka long kum ka jingpynkheiñ ïa ka Section 2 jong ka Meghalaya Transfer of Land (Regulation) Act, 1971, kaba khang ban die ïa ki jaka riewlum sha ki bym dei ki riewlum khlem ka jingbit na u Deputy Commissioner bad ïa kane ym shym la ai ha ka jingbit jong ka EIA,” la ong ka seng.
Ka JNC ka la kam ruh ba ka la lap katto katne ki jingduna kiba kongsan ba ïa ka jinglong aiñ jong ka khyndew ym shym la pynshisha bad ba ka EIA ka la pynpaw ba la thied ïa ka jaka na ka bynta ka Shree Cement Project Limited khlem ki kot ki sla na ka ophis u Deputy Commissioner bad ka jingmynjur na ka Jaiñtia Hills Autonomous District Council (JHADC).
“Ka EIA ka kam ba ka projek ka don 6.35 kilomitar na ka khlaw ba la buh kyrpang jong ka Saipung. Hynrei kam shym la aiti ïa ka kaiphod (clearance). Ka EIA ka kdew ïa ka shithi jong u DFO (08.10.25), hynrei ïa ka shithi pat khlem suh lang. Kane ka pyntlot ïa ka jingshaniah jong ka projek. La shu kyntait noh ïa ka bor synshar jong ka JHADC. Ka EIA ka ong ba ka jaka ka don ha ka Elaka Nongkhlieh hynrei kam don satia ka NoC na ka JHADC. Ym don jingpynshisha na u Dolloi. Ym don kot sla kum ka jingmynjur na ka Dorbar Shnong. Kane ka dei ka jingpynkheiñ im im peit peit ïa ka Sixth Schedule,” la kynnoh ka seng.
Ka JNC ka la kyrpad ïa ka Commissioner and Secretary ban phah tohkit ïa ka jingpynkylla ïa ka jaka riewlum sha ki bym dei ki riewlum, ban pynshisha la ka don neem ka jingmynjur jong u DC.
Ka seng ka la phah ruh lai tylli ki shithi, nalor ka jingujor mynta ka sngi, sha u Deputy commissioner ka East Jaiñtia Hills halor ka jingpynkylla jaka beaiñ bad ka jingkyrpad ban pynsangeh noh ia ka jingpynsngew paidbah.
U President ka JNC Bah Sambormi Lyngdoh u la ong, “ka JNC kan ym shah ïa kano kano ka jingpynkhein ïa ka hok khyndew jong ki riewlum bad ka seng ka la ujor lai tylli ki shithi bad kawei ka jingujor kaba mynta. Ka Seng kan dang ïai buddien ïa kane ka kam katkum ka aiñ.”
