Shillong, Nohprah, 05: U Myntri ka Sorkar Jylla uba khmih ïa ka tnat Legal Metrology Bah Sanbor Shullai ha ka sngi Thohdieng u la kyrsiew thiah ïa ki ophisar jong kane ka tnat treikam khnang ban peit ïa ka jingthew tuh ha ka thew ka woh.
Ha ka jingïakren bad ki lad pathai khubor hadien ba la wai ka jingïalang, u Bah Shullai u la ong, “ngi kren da kaba shai ba ngi don ïa kane ka aiñ ban khanglad ïa ka jingthew tuh. Haba ka don ka jingthew tuh ka don ka jingshah ktah jong ki baduk ki basuk.”
U la ai nuksa ruh da ka phlim Bollywood kaba kyrteng, “Nayak” kaba la ak da u Anil Kapoor kaba pyni ia ka jinglong Myntri Rangbah ba tang shi sngi ha kaba u la sospon lut ïa ki ophisar ki bym treihok.
“Bun ki paidbah kim tip ba kane ka tnat treikam ka don bad kam shym la treikam la bun bun snem bad ki paidbah ruh kim tip,” u la ong shuh shuh.
U la ai nuksa ruh ba ki paidbah kim tip la ki shah leh thok ha ki jingthew kum haba thied khaw, thied umphniang petrol, thied marbam, thied ksiar bad ngi pyntip ïa kane mynta ka sngi khnang ba ki paidbah ruh kin dup tip.”
“Nangne shakhmat ki paidbah lada ki don kino kino ki jingujor kim dei ban sheptieng ki lah ban wanrah ïa ka jingujor katkum ka aiñ ngin pynshitom ïa ki nongdie kiba thew tuh,” u la ong.
“Nga kyrmen lyngba kane ka jingïalang kaba la long mynta ka sngi bad naduh lashai nga kyrpad ïa ki (ophisar) ba kin trei smat bad ban peit ïa ki jingeh jong ki paidbah babun balang,”u la ong.
