Shillong, Nohprah, 05: Ka Hynniewtrep Youths Council (HYC) ka la kam ba ka jingsaphriang jong u drok hapoh ka nongbah Shillong ka dei na Lum Survey kaba don sha lyndet ka them Iewmawlong.
Ha ka jingïakren bad ki lad pathai khubor ha ka sngi Thohdieng, u President ka HYC Bah Roy Kupar Synrem u la buh jingkylli ruh ïa ka Sorkar Jylla bad ïa ka Defence Estate Office kiba shu sngap mynthi ïa ka jingdawa ban kyndang ïa ki iing ba la shna beaiñ da ki poiwir ha Lum Survey.
“Ngi la sakhi ba ka Lum Survey ka long kum ka ktem ki kam sniew bad ki kam runar ruser khamtam ha kaba khaii beaiñ ïa u drok, kaba buh jingma ïa ka jingim jong ki khun samla bad ïa ki nongshong shnong ha ka jylla,” la ong u Bah Synrem.
“Watla ngi la ujor la bunsien, ngi la phah ïa ki jingthoh bad ngi la dawa ruh hakhmat ki bor ba dei peit, hynrei ngim ïohi satia ba kan don ka jingpynpra ïa ki iing ba la shna beaiñ ban khanglad ïa ka jingkhaii beaiñ ïa u drok bad ïa kiwei kiwei ki kam sniew kiba mih na kane ka jaka,” la bynrap u Bah Synrem.
“Sa katno ngut ki samla kin kylla sohpdung ha u drok shwa ba ka Sorkar kan plie ïa ki khmat jong ka,” la buh jingkylli ka HYC ïa ka Sorkar.
“Ka Sorkar Jylla lyngba ka Directorate of Land Records bad ka tnat Revenue, ka Defence Estate Office ki ladep leh ïa ka sorbe hynrei ngi ïohi ba haduh mynta kane ka jaka ka dang shu sah kumjuh khlem da ïohi dak eiei ban kyndang ïa kiba sah be-aiñ ha kane ka jaka,” u la ong shuh shuh u Bah Synrem bad bynrap, “ka jingbym shimkhia ka buh ïa ki nongshong shnong jong ka nongbah Shillong, khamtam ïa ki samla jong ka Bri u Hynniewtrep ha ka jingma kaba manla ka por. Baroh ar ki bor synshar ki tip bha ïa ka jingsah beaiñ bad ki kynhun runar kiba don ha kane ka jaka, hynrei ha ka jaka ban pynbeit ïa ka jingeh, ki la ailad ïa ki kam sniew ban nang kharoi shuh shuh.”
“Haba ki bor synshar ki phai da ka lyngkdong, ki runar ki nang ïoh bor. Ka Lum Survey ka paw shynna ïa ka jingphiel jong ka Sorkar,” la kynthoh u President ka HYC.
U la ong ruh ba ka HYC ka pynkynmaw ïa ka Sorkar ba u drok u long ka jingma ïa ka shongsuk shongsaiñ, uba pynjot ïa ki longiing longsem, uba pynsniew ïa ka koit ka khiah jong ki paidbah bad uba ai kamai ïa ki runar. Ym lah ban ailad ba ka Shillong kan long ka jaka rieh tngen jong kito kiba pynsniew ïa ka lawei jong ngi.
“Lada ka Sorkar bad ka Defence Estate Office ki dang ïai bteng ban shu sngap mynthi halor kine ki jingeh, ka HYC kan shim ïa ki sienjam tad haduh ban da pynkhud lut ïa ki briew kiba sah beaiñ bad ban pyndkut ïa ka jingkhaii drok na Lum Survey,” la maham u President ka HYC.
“Ka jingbym leh eiei jong ki bor synshar kam long shuh kaba lah ban pdiang. Ki samla jong ngi bad ki nongshong shnong jong ka Jylla ki deihok ban ïoh ïa ka jingïada kaba bha bad ka Shillong ka dei hok ban ïoh ïa ka lawei kaba khuid ym ka pdeng jong ki kam beaiñ,” la ong shuh shuh u Bah Synrem.
