Shillong, Nohprah, 05: Ka Dorbar Shnong Mukroh Pyllun ha ka sngi Thohdieng ka la phah tuklar ha u Myntri ka tnat Kam Pohing ka Sorkar Pdeng u Amit Shah da kaba aiti ïa ka dorkhas lyngba u Lat ka jylla u C.H Vijayashankar ban phah tohkit ha ka Central Bureau of Investigation (CBI) halor ka jingshah siat ïap jong ki san ngut ki Khasi-Pnar ha ka 22 tarik, Naiwieng, 2022 ha ki Pulit ka jylla Asam ha ka shnong Mukroh, West Jaiñtia Hills District.
Ha ka jingïakren bad ki lad pathai khubor hadien ka jingïakynduh ïa u Lat ka Jylla, u Secretary ka shnong Mukroh u Bah Precious Sten u la ong, “ngi la pynsngew ha u Lat ïa ki jingeh ba ngi ïakynduh. Shwa ban ïakynduh ïa u Lat ngi ladep ban pynsngew ha ki tyndong skhor ka Sorkar Jylla. Ka jingpynsngew ha u Lat ka long ban pynpoi ïa ka rai kaba ngi la shim ha ka jingdap 3 snem ka jingshah siat ïap ki san ngut ki nongshong shnong jong ngi ki Pulit Assam khamtam ban pynstet ïa ka jingtohkit jong ka CBI.”
U la ïathuh ruh ba kum ka Dorbar ki la pynsngew ha u Lat ïa ka jingïakajia pud hapdeng ka Sorkar Meghalaya bad ka Sorkar Assam khnang ba ki paidbah kiba sah ha khappud kin ym mad shuh ïa kijuh ki jingeh kiba ki paidbah ki la mad haduh mynta.
“Ngi la shim ïa ka rai ha ka Dorbar ba ka Sorkar kan pynsagneh noh mardor ïa ka jingkyntur sha pud u sam jong ka shnong lyngba ka Karbi Anglong Autonomous Council kaba shna ïa ka kper rep slasha ha kaba la pynsyllen ïa u lum bad kane ruh ngi la pynsngew ha ka Sorkar,” u la ong shuh shuh.
“Ngi la pynsngew ruh ha u Lat ïa ka jingshah pynïap ki briew jong ngi ha u Rymphang, 2003 bad haduh 6 ngut ki nongshong shnong jong ngi ki la shah pynïap ha ka Karbi National Volunteer bad haduh mynta ki paidbah ki dang im hapdeng ka jingtieng jingsyier haduh kine ki sngi,” la ïathuh shuh shuh u Bah Sten.
“U Lat u la kular ba un sa shimkhia bad ngi la pynsngew ruh sha ka Jaiñtia Hills Autonomous District Council bad ngi la kyrpad ruh ïa ka Sorkar hynrei haduh mynta ka projek jong ka KAAC ka dang ïai bteng bad kam shym la sangeh ngi ruh ngim tip na ka liang ka Sorkar ka leh aiu,” la pynpaw u Bah Sten.
“Ngi sngewthuh ba kine ki jingjia ki mih na ka jingïakajia pud. Hynrei ngi ong beit ïa ka Sorkar ba kane ka ishu ka dei kaba eh. Ngi sngewthuh ïa kata, hynrei ngi kyrpad ïa ka Sorkar ban pynstet ïa ka jingpynbeit ïa u pud u sam. Kaba ngi kwah ka long ba ka KAAC ka dei ban pynsangeh noh ïa ka jingkyntur pud shapoh u pud u sam jong ka shnong Mukroh,” ong u Bah Sten.
Haba pynshisha ba ka jaka ba la kyntur pud da ka KAAC ka dang hap hapoh u pud u sam jong ka shnong Mukroh, u Bah Sten u la ong, “ngi pynshong nongrim katkum ka Notification kaba 28 tarik, Risaw, 1998 ba ka JHADC ka ladep ban ithuh ïa u pud u sam. Ngi la don ïa ki kot ki sla ha ka kti bad na kata ka daw ngi nud ban kam ba ka KAAC ka kyntur sha u pud u sam ka shnong Mukroh.”
“Haduh mynta ngi don beit ka jingshaniah ha ka Sorkar. Naduh ba ka Sorkar Assam ka la sdang ban kyntur pud na ka liang jong ka Dorbar Shnong ngi ju pyntip lyngba ka Police Out Post, lyngba ka ophis Deputy Commisioner, lyngba ka JHADC bad ngi la pyntip wat sha ki Symbud Myntri Rangbah hynrei haduh mynta ki lah ban shu kren napoh ophis ba ka jinglong jingman kam leilei hynrei ngi kiba mad ïa ka jingthar jong u shiah ka jingeh ka dang ïai bteng na ka por sha ka por,” la ong u Bah Sten.
“Lada ka Sorkar Meghalaya kam dei kaba tlot balei haduh mynta kam pat shna ïa ka Border Out Post ha Mukroh bad balei ki Pulit ki dang hap ban sah hapoh ka Community Hall jong ka Dorbar Shnong. Kane baroh ka dei ka jingtlot jong ka Sorkar.
