Shillong, Nohprah, 06: Ka Hynniewtrep Border Dispute Redressal Forum (HBDRF) ka la takraiñ tyngeh ïa ka Sorkar Jylla halor ka jingsngap mynthi ïa ka jingeh jong ki paidbah kiba sah ha ka thaiñ Block-I bad Block-II na ka jingïakajia pud bad ka Jylla Assam bad ka jingbym ai jingithuh ïa ki shnong kiba hap hapoh ka Elaka Labang Nongphyllut wat hadien ba la ai jingithuh da ka Jaiñtia Hills Autonomous District Council (JHADC).
Ha ka jingïakren bad ki lad pathai khubor hadien ba la wai ka jingïalang ha nongbah Shillong u Chairman jong ka Forum Bah Chandame Sungoh u la ong, “ngi la ïakren sani halor ka jingsngap mynthi jong ka Sorkar Jylla ïa ki jingthoh bad ki dorkhas ba ngi ladep aiti sha ka Sorkar wat hadien ba ngi ladep ban shong jingïalang bad ki arngut ki Symbud Myntri Rangbah (Bah Prestone Tynsong bad Bah Sniawbhalang Dhar) bad u Myntri Rangbah Conrad K. Sangma.”
“Ha ki jingïakren bad ka Sorkar ngi ladep ban pynsngew ba ka Sorkar kan shimkhia bad i kumba ka leh hynrei la 7 snem naduh ka por ka MDA-I ngim pat ïohi kawei ruh ka dak ba ka Sorkar kan leh eiei halor ki jingthoh ba ngi ladep ai,” u la ong.
U la ïathuh ba ka JHADC ka la pynskhem ïa u pud u sam ka Elaka Labang Nongphyllut da kaba ai sanad ïa u Acting Dolloi bad ïa ki Waheh Shnong naduh 2-3 snem mynshwa hynrei haduh mynta ka Sorkar kam pat ai jingithuh ïa ki shnong kiba hap hapoh ka Elaka Labang Nongphyllut kaba dang hap hapoh ka jylla Meghalaya.
“Ka jingpynim biang ka JHADC ïa ka Elaka Labang Nongphyllut, ka jingai sanad ïa u Acting Dolloi bad ïa ki Waheh Shnong kam i don jingmut eiei namarba kim (Sorkar) lah ban leh eiei. Ka long kum ka kamkai,” la kynthoh u Chairman ka Forum.
“Ki shnong kiba la ithuh da ki Autonomous District Council ka dei ka rukom jong ka Sorkar ban ai jingithuh ïa ki bad ban ai ïa ka Village Court na ka bynta ki jingdonkam bapher bapher. Hynrei mynta la 2-3 snem watla ka District Council ladei ai jingithuh hynrei ka Sorkar kam pat shimkhia eiei, u la ong shuh shuh.
“Ha ka 25 tarik, Jymmang, 2025 ngi la iakynduh markhmat bad u Myntri Rangbah bad u la ong ba un sa shimkhia ban ïakren bad ka Sorkar Assam hynrei haduh mynta ngim pat ïohi ïa ki dak ki shin. Kaei kaba jia mynta ha Mukroh bad ha Lapangap ngi ïohi ba kam dok ka dak ka shin. Dei na kata ka daw ba ngi sngewkhia,” la ïathuh u Bah Sungoh.
U la ïathuh ba ka Forum ha ka jingïalang ka la shim ïa ka rai ban sa leit ïakynduh biang ïa u Myntri Rangbah ka jylla ban ïakren beit da kaba shai aiu ka sorkar ka la leh halor ki jingthoh ki jingtar ba ngi ladep ai bad ïa ki jingkular hakhmat ka Forum bad kumjuh hakhmat ki paidbah ka Block-I bad baroh ki paid ka Bri u Hynñiewtrep.
“Ka jubab kaba ngin ïoh (hadien ka jingïakynduh ïa u Myntri Rangbah ka jylla) ngin sa shim ïa ka rai. Ngin kren beit da kaba shai lada ka sorkar kam shimkhia ban pyndep ïa ka jingkular ngim banse ban shim da kiwei pat ki sienjam wat lada dei ban shah thngan ne wat ban ïakhih,” la maham u Chairman ka Forum.
U la ïathuh ba wat haduh mynta ka Forum kam pat ïoh jubab na ka Sorkar halor ki jingthoh ba ladep ai bad ïa ki jingïakren ba ladep pynlong ha ki bnai baladep.
“Ka jingbym shimkhia jong ka Sorkar ïa ka khiah ka shon jong ka jaidbynriew jong ngi ka long kaei kaei kaba pynsngewsih,” la kynthoh shuh shuh u Bah Sungoh.
U la ïathuh ba ka Forum ka la dawa ïa ka Sorkar ban pynïoh ïa ki Birth Certificate, ka EPIC, Aadhaar Card, MHIS Card.
“Haduh mynta 70 percent ki briew jong ngi kim pat don ïa kita ki kot ki sla. Ngi la khang ïa ka Assam ruh hynrei na Meghalaya ki dang buh teng haba tang ïa ka shnong kam pat ai jingithuh shaei ki paidbah kin ïoh ïa ki dulir,” u la ïathuh.
