Shillong, Nohprah, 06: Ki la don kumba 50 ngut ki samla wadkam kiba la shah pynduh noh ïa ka hok ban thoh ïa ka eksamin na ka post Enumerator ba la pynlong da ka District Selection Committee (DSC) East Khasi Hills District ha ka sngi Saitjaiñ ha BK Bajoria School, Shillong.
Tang shu ïoh jingtip halor kane, u nonglum khubor jong ka Batesi Tv mar mar u la leit ban tohkit na kine ki samla kiba ïa lum shabar ka phalor jong ka skul khnang ban tip ïa ka daw tynrai.
Ki samla wadkam ki la kynnoh ba dei hi ka Principal jong ka skul ka bym shah shuh ïa ki ban rung shapoh wat haba ki la poi 15 minit shwa ban sdang ka por thoh eksamin.
‘Ha kiba bun ki jaka thoh eksamin ki ju shah beit ban rung wat haba ngi poi ynda la dei ka por ban thoh, hynrei hangne pat balei kim shah shuh ban rung wat haba ngi la poi ha ka por 8:40 baje mynstep,” la ong ki samla wadkam ki bym kwah ban pynpaw kyrteng.
“Kane ka dei ka skul kaba nyngkong eh kaba leh ïa ngi haduh katne ba kin pyneh, ym tang ïa nga marwei hynrei ïa kiba bun hangne. Ngi la kren bad kyrpad ïa i (Principal) hynrei i pyneh beit, i pyni beit te ïa ka iktiar jong i, im kwah.Ka pyni ba kane ka dei skul jong nga, ngan ym bud ïa ka rul. Im sngap shuh ïa ngi, i kylli pynban balei phi pynibor kaba pyni ba kam dei satia ka rukom kaba dei. Dei na kata ka daw kaba pynsngewsih ïa ngi kaba ngi hap ban ieng hangne,” la ong ki samla wadkam.
“Mynta ka jingshai aiu ba ngin ïoh na i, ngim tip. Ka jingshai aiu ba ngin ïoh na ka Sorkar ruh ngim tip, kata ka dei u dak jingkylli uba heh ïa ngi,” ki la ong.
Haba kylli, kawei na ki samla wadkam ka la ong, “nga la poi hangne 8:37 baje-8:40 baje thik hynrei u nongap pahara um shah shuh ban rung u ong ba ka Principal kam shah shuh ban rung shapoh. Ka ktah bha. Katto tylli ki eksam ngi la leit thoh ngim pat ju ngat kumne nalor ba ngi wan na ki jaka kiba jngai kim pyrkhat.”
“Lada ym shah ïa ngi, kumno phi shwa ïa kiwei pat kiba slem tang san minit ruh. Lada ngi slem ma ngi tang san minit kumno ïa kiba hashwa jong ngi pat phi shah,” la buh jingkylli ki samla wadkam.
