Shillong, Nohprah, 09: Ka Khasi Students Union (KSU) Khliehriat Circle ryngkat bad ka seng ki nongrep jong ka Elaka Nongkhlieh East Jaiñtia Hills District ha ka sngi Baar ki la aiti da ka dorkhas ha u Chief Executive Member (CEM) ka Jaiñtia Hills Autonomous Council (JHADC) u Bah Thombor Shiwat ban pyrshah halor ka jingtyrwa ban pynlong ïa ka jingpynsngew paidbah ka ban sa long ha ka 19 tarik, Nohprah 2025 halor ka jingthmu ban tei ïa ka karkhana pynmih dewbilat jong ka Shree Cement Limited ha ka shnong Daistong, East Jaiñtia hills district.
Ha u kyrwoh ba la phah sha ki lad pathai khubor ka KSU ka la ïathuh ba wat u CEM ka JHADC u la pynpaw ïa ka jingsngew lyngngoh kumno ba u bar jylla u ïoh ban thied jaka hapoh u pud u sam ka District Council namarba ka District Council kam don jingtip eiei halor kane bad kynnoh ruh ba ka Sorkar kam khein snep shuh wat ïa ka iktiar jong ka District Council.
Na ka liang jong u CEM u la kular ban sa phah tohkit halor kane bad lada ka poi sha ka miej jong ka Council kan pynsangeh mardor ïa kane ka jingthmu.
Ha kane kajuh ka sngi ki nongïalam ka seng ki la ïakynduh ruh ïa u Deputy Commissioner jong ka East Jaiñtia Hills District ban pynpaw ïa ka jingpyrshah ïa ka public hearing. Halor kane, u Deputy Commissioner u la kular ba un sa phah ïa ka dorkhas jong ka seng sha ka Meghalaya State Pollution Control Board (MSPCB) bad sha ka State Environment Impact Assessment Authority (SEIAA).
Halor ka jingdie lilam ia ka jaka sha ka Shree Cement Limited da uwei u trai shnong na ka liang jong u Deputy Commissioner u la ïathuh ba kane kan dang hap ban phah sha ka tnat Revenue ban bishar.
“Kum kane ka rukom treikam ka long kaba ma namarba ka Sorkar hi ka don jingthmu ban leh donbor ka lah beit ban tah sia lieh wat ïa ki kot ki sla ban ïaid beit ka kam,” la kynnoh ka seng.
Ka seng ka la kyntu ïa u Deputy Commissioner ba lada ym pat pdiang mynjur ban aiti ïa ka jaka kaba mut wat ïa ka public hearing ruh um dei hi ruh ban pynlong haba tang ïa ka khyndew ba ka Shree Cement Limited kan shna ïa ka karkhanaa ruh ka dang don hapdeng ka jingïaid lynti.
Ka seng ka kyntu ïa ki paidbah jong ka shnong Daistong ba ki dei ba ieng rangbah bad kim dei ban ïapeiñ ïa ka hok longtrai.
Ka seng ka pynpaw ba kan dang ïai don ryngkat bad ki paidbah jong ka shnong Daistong ban pyrshah ïa kane ka jingthmu jong ka Shree Cement Limited.
