Shillong, Nohprah, 09: Ki Pulit ka Nongstoin Police Station ha ka miet Lah Sngi u Blei ki la ïoh kem ïa uwei u briew uba la don kumba 39 snem ka rta ïa uba la suba ba u dei u nongkhaïi drok hadien ka jingkhynra lang jong ki pulit ka Nongstoin Police Station bad ka kynhun Anti-Narcotics Task Force.
Ïa une uba la shah kem la tip kyrteng kum u Vicky Swer uba dei u nongshong shnong ba shipor jong ka Shnong Nondein bad la kynnoh ba u dei uba ju khaïi ïa u drok na ka dukan die taïar kaba don ha Nondeiñ.
Ha ka jingkhynra ki Pulit ki la ïoh ban kurup 10.18 gram u drok Heroin, 89 tylli ki tyndong thylli, ar tylli ki synduk sabon, 6 tylli ki Android Smartphone, ar tylli ki Keypad Phone bad ka pisa T. 60,498 nalor kiwei kiwei ki tiar kiba pyndonkam ha ki kam runar.
Ki Pulit ki la register case hapoh ka NDPS Act bad ka jingtohkit kaba bniah ka dang ïaid mynta shakhmat.
