Shillong, Nohprah, 11: Ki ASHA kiba don hapoh ka shatri jong ka Meghalaya ASHA Workers Union (MAWU) ki la pynpaw ïa ka jingsngewkhia namarba ka Sorkar Pdeng kam pat pyllait ïa ka tulop jong ki mynta la hynñiew bnai kata naduh u bnai Jymmang haduh mynta u Nohprah hynrei ka tulop kaba dei ban ïoh na ka Sorkar Jylla ki la ïoh lut baroh bad kaba sah ka long sa tang na ka bhah ba la hap ban pyllait da ka Sorkar Pdeng.
Ka President jong ka MAWU ka Kong Mirajune Myrsing ha ka jingïakren bad ki lad pathai khubor ha ka sngi Palei ka la ïathuh ba kata ka hynñiew bnai kaba sah ka dei tang hangne ha rilum Khasi-Jaiñtia hynrei ha rilum Garo lei ki don kiba ym ïoh mynta la shisnem.
Ka la ïathuh ba ki la ïoh ban ïakren bad ki bor pynïaid jong ka DHS bad la kular ha ki ban pyllait noh hapoh ka 19 tarik mynta u bnai.
Ha ka jingïalang, ki ASHA ki la byrngem ba lada kim ïoh ïa kane ka pisa hapoh ka 19 tarik mynta u bnai kin pynlong noh da ka jingïakhih sangeh treikam.
