Shillong, Nohprah, 15: Ka Iingbishar Meghalaya High Court ka la ai por ïa ka Shillong Municipal Board ban pynkynriah lut ïa ki nongdie madan ha ka thaiñ Laitumkhrah shwa ka taiew banyngkong jong u bnai Kyllalyngkot, 2026.
Ka Division Bench kaba kynthup ïa u Chief Justice Soumen Sen bad u Justice HS Thangkhiew ki la bishar bniah ïa ka jingpyntyllun shakhmat ïa ka kam da ki pynïaid jong ka Municipal ha ka jingbishar ha ka sngi Baar. Ka iingbishar ka la kdew ïa ka jingsngewhun halor ka jingpyntyllun ïa ka kam, ban ithuh ïa ki jaka shong die madan bad ban pyndep ïa ki aplikeshon jong ki nongdie madan.
Katkum ki kot ki sla ba la aiti sha ka ïingbishar, ka Provisional Town Vending Committee ka la eksamin ïa ki 43 tylli ki jingdawa jong ki nongdie madan ha ka por ba la pynlong ïa ka jingjurip ha u bnai Naiwieng. Na kine, 14 ngut ki nongdie madan ba ladep ban pynrung ha ka thup ba la pynmih, katba 15 ngut na ki 29 ngut la shem ba ki deihok bad hadien ba la pynshisha bad la ai jingmut ban leh ei ei.
Ka komiti ka la rai ban pyndep ïa ka thup jong ki nongdie madan ynda ka Sorkar ka la pyntip paidbah ïa ki jaka die ba la buh kyrpang. Ka Sub Committee ïa mynta ka dang pynkhreh ïa ka Standard Operating Procedures ba thikna na ka bynta ban bishar ïa ki jingdawa bad ki jingpyrshah, da kaba ïamir jingmut bad ka seng jong ki nongdie madan.
Kane ka mukotduma, ka kynthup ïa bun tylli ki Public Interest Litigations ba kynthup ïa ka PIL No. 17 jong u snem 2021, kaba la mudui da u Philip Khrawbok Shati, pyrshah ïa ka Jylla Meghalaya, ha ryngkat ki mat kiba ïadei bad ka Meghalaya bad ka Greater Shillong Progressive Hawkers and Street Vendors Association.
Ka Iingbishar ka la buh sngi ban shong bishar biang ha ka 28 tarik Kyllalyngkot, 2026, da kaba bthah ruh ïa ka Shillong Municipal Board ban phah shuh shuh ïa ki kaiphod shwa ka sngi ban shong bishar.
