Shillong, Nohprah, 15: Ki nonghikai kiba don hapoh ka shatri jong ka Khasi Jaintia Deficit School Teachers Association (KJDSTA) ha ka Lah Sngi u Blei ki la mih paidbah ban ïaalum lang ha madan Malki, Shillong ban pynpaw ka jingpyrshah ïa ka Sorkar bad ban dawa ba ka Sorkar ka dei ban siew ïaa ki hok ba kim shym la ïoh shuh mynta la bun bnai.
Ha kane ka jingïakhih, ki nonghikai Deficit na ki shnat treikam bapher ki la wah ïa ki poster kiba don ïa ki jingthoh bapher bapher ban pynsngew ïa ka Sorkar ïa ki mat jingdawa ba kynthup naduh ka Dearest Allowance, ka Arrear, ka Pension Scheme bad kiwei kiwei ki mat jingdawa.’
Ki nonghikai ki la wah ruh ïa ka poster ba la thoh , “Stop The Harrasment of Teachers.’
Ka seng ka la pynkhreh ruh ïa ka dorkhas ban sa leit aiti sha u Myntri Rangbah ka Jylla u Conrad K. Sangma ban dawa ba ka Sorkar ka dei ban pynkiew noh ïa ka Dearness Allowance kaba ïaryngkat bad ki nongtrei sorkar bad ban kyntiew noh ïa ka jingsiew ïa ka Arrear na ka 43% sha ka 51%.
Ka seng ka la dawa ïa ka Sorkar Jylla ban pynurlong ïa kine ki jingdawa shwa ka 15 tarik, Kyllalyngkot, 2026 hynrei lym kumta ka seng kan pynlong da ka jingïakhih.
Nalor kine, ka KJDSTA ka la dawa ïa ka Sorkar ban pynstet noh ha kaba pyntreikam ïa ka CPF, ban pyllait noh ïa ka Death cum Retirement Gratuity sha ki nonghikai skul Deficit ba la shongthait, ban pynstet ha kaba pyndap ïa ki kam nonghikai ba la thylli ha ki skul Deficit ha baroh kawei ka jylla, ban pynthikna ban pyllait noh ïa ka Winter Allowance bad kiwei kiwei ki jingsiew, ban siew tista ïa ka tulop jong ki nonghikai skul Deficit.
