Shillong, K’lyngkot, 14: Ki Pulit ka Anti-Narcotic Task Force (ANTF) kiba la ïoh jingtip na ka tnat syntiat ba ki don ki snar nongkhaïi drok kiba rieh tngen ha ka slum ha Lum Survey ha ka sngi Balang ki la leit khynra bad ïoh kurup da ki spah tylli ki tyndong thep drok ba thylli bad ïa ki thyrnia injekshon ba la thep ha kawei ka plastik.
Ha kane ka jingkhynra, ki Pulit ka ANTF kiba la ïalam lang ïa ki ksew K-9 kim shym la ïoh kurup satia ïa u drok bad ïa ki nongkhaïi drok hynrei ki la ïoh bat tang ïa ki lai ngut ki nongdih drok.
Tang shu poi ki Pulit ANTF ha kane ka slum ki la kthong ïa ki nongdih drok kiba ju riehtngen ha kane ka jaka kiba ryngkang nalor ki tnum iing bad phet lailum laiwah ban lait na ka kti jong ki Pulit.
U nonglum khubor ka Batesi TV uba la poi ha kane ka jaka katba ki Pulit ka ANTF ki dang pynlong ka jingkhynra u la lap ba ka don kawei ka Madrasa kaba ki Muslim ki la ker da ka plastik ban ai jinghikai kotniam ïa ki khynnah rit bad la ïoh jingtip ruh ba ha kane ka jaka ki ju pynlong ruh kum ka Namaz lane ka jaka duwai.
