Shillong, K’lyngkot, 14: Ki kynhun bapher bapher ka skulbah NEHU kiba kynthup ïa ka North-Eastern Hill University Students’ Union, ka Khasi Students’ Union, NEHU Unit, ka North-Eastern Hill University Teachers’ Association, ka North-Eastern Hill University Non-Teaching Staff Association bad ka Meghalaya Tribal Teachers’ Association ha ka sngi Balang ki la aiti da ka jingthoh ban phah tuklar ha u Myntri Rangbah ka Jylla u Conrad K. Sangma halor ka jingdawa ba dei ban weng noh ïa u Prof. PS Shkla kum u Vice Chancellor ka skulbah NEHU.
Kane ka jingphah tuklar ki kynhun na ka skulbah NEHU long hadien shi sngi ka jingïakynduh ïa u Lat ka Jylla u CH Vijayashankar ba un tuklar lem halor ki kynrum kynram hapoh ka skulbah NEHU da kaba ïakren bad ki bor ba dei peit jong ka Ministry of Education, ka Sorkar India.
Ha ka jingïakren bad ki lad pathai khubor u President jong ka NEHUTA u Prof. Lakhon Kma u la ïathuh ruh ba kum ki kynhun ka skulbah NEHU ki la phah tuklar ha u Myntri Rangbah ban bthah ïa ka Pro Vice Chancellor ka NEHU Tura Campus ba kan shimti ïa ka jingkitkhlieh ban pynïaid ïa ki kam hapoh ka NEHU Shillong Campus hadien ba u Pro Vice Chancellor u la iehnohkam dang shen kat haduh ba kane ka la ktah lut ïa ka treikam treikam hapoh ka skulbah NEHU.
U President ka KSU NEHU Unit u samla Robin Nongrem u la ïathuh ba u Myntri Rangbah u la kular ban sa pynsngew sha ki bor ba dei peit jong ka Ministry of Education ka Sorkar India bad ban bthah ruh ïa ka Pro Vice Chancellor ka NEHU Tura Campus ka Prof. Fameline K. Marak ba kan pyndep ïa ka kamram hapoh ka NEHU Shillong Campus khnang ban ym buh jingeh ïa ki samla pule, ki nonghikai bad ïa ki nongtrei jong ka skulbah.
U President jong ka NEHUNSA u Bah Millford Thangkhiew u la ong kumba ka long mynta ki nongtrei hapoh ka skulbah NEHU ki don hapdeng ka jingeh kaba khraw namarba ka jingduna nongtrei bad ka ktah ruh wat ïa ka trei kam trei jam na ka daw ka jingbym ïaid beit ïaid ryntih hapoh ka skulbah.
U la ong ruh ba lada ka NEHU ka ngam, ka wanrah jingeh ruh wat ha ka pule ka puthi bad kan ktah ruh wat ïa ka pliangja jong ki nongtrei hapoh kane ka skulbah.
