Shillong, K’lyngkot, 17: Ki nongïalehkai jong ka All Meghalaya Traditional Wrestling & Pankration Association (AMTW&PA) ki la ïoh rah ïa ka nam lahduh bad ïa ka kyrdan ba nyngkong ha ka Pankration, kaba lah jer kyrteng thymmai da ka Amateur Mixed Martial Arts ha baroh kawei ka pyrthei da ka United World Wrestling, ha ka 13th All India Traditional Wrestling and Pankration Championship kaba la long ha Mapusa, Goa ha ka 8 tarik bad ka 9 tarik Kyllalyngkot, 2026.
Ha ka 1st Amateur Mixed Martial Arts National Championship ka kynhun ïalehkai jong ka jylla Meghalaya ka la ïoh khur haduh 9 tylli ki takma Ksiar, 7 tylli ki takma Rupa bad 9 tylli ki takam Rnong. Nalor kata, ka kynhun ka la ïoh rah ruh ïa ka Champion Team Trophy lyngba ka jingjop ïa ka Amateur Mixed Martial Arts (Elite Pankration) kaba la long ka burom bakhraw ïa ka jylla Meghalaya.
Ïa kane ka lympung ïalehkai la pynlong da ka All India Traditional Wrestling & Pankration Federation bad la pynbeit nadong shadong da ka All Goa Traditional & Pankration Association.
Ka President jong ka Association ka Kong Anita Songthiang ka la pynpaw ïa ka jingsngewkmen halor kane ka jingjop donburom jong ki khynnah ïalehkai ka jylla Meghalaya kiba la thaw histori ha ka Amateur Mixed Martial Arts ha Meghalaya da kaba ïoh khur ïa kane ka jingjop bad kaba long ruh ka kynhun banyngkong eh ha ka ri India naduh ba la jer kyrteng ïa ka Pankration Elite sha ka Amateur MMA.
