Shillong, K’lyngkot, 20: Ïa ka met ba dang sah jong u Rev. Dr.R.R Cunville la tep donburom ha ka sngi Baar katkum ka jingpynïaid jong ka Balang Presbyterian Laitumkhrah.
Shuwa ban rah ïa ka met sha Ïingmane, la pyndep ïa ka jinglehburom ha ïingsah ha Upper Lachaumiere ha kaba la ïoh ïa ka jingkren na ki bahaïing kynthup ïa u khun rangbah u Bah Raphael Cunville bad kumjuh ruh na ka khun ksiew.
Na ïing ki bahaïing ki la rah ïa ka met sha ïingmane jong ka Balang Presbyterian Laitumkhrah bad mar ïa poi ha khyrdop jong ka ïingmane ki khun samla ka Balang kumjuh ruh ki Tymmen Basan ki la shimti ïa ka met ban pynrung sha ïingmane.
Hadien ka jinglehburom ha Ïingmane, ki Pastor ka Laitumkhrah Presbytery ki la shimti ïa ka met ban rah na ïingmane shaduh sha baranda bad na baranda la shimti biang ka Balang ban aiti ha ki bahaïing hasem ban rah sha lum jingtep ha kaba la tep donburom ïa ka met kaba sah jong u Pastor Cunville.
Ha ïing mane la ïoh ki jingkren na kiba bun ki nongkren naduh ki Pastor, ki nongïalam Balang, na u khun ksiew jong u Billy Graham u Roy Graham bad na ka nongïalam jong ka United Bible Societies ka Dr. E Duncan bad kumjuh ki jingrwai ai khublei khatduh ïa u Pastor Cunville ba la rwai ka Choir jong ka Balang Laitumkhrah bad ka jingrwai na u Pastor Terence S Wanshong.
Khyndiat shaphang ka jingim jong u Pastor Cunville: La kha ïa u Pastor Rieweh Robert Cunville ha ka 15 tarik, Lber 1939. Ha ki sngi ki jinglong khynnah samla u la leit ban pule ïa ka Law sha London hynrei jia ryngkhat ba u la ïohsngew ïa ka jingïalap ïa ka Gospel bad kumta ka jingmut jong u ka la kylla noh bad u kwah ban long u nongïalap bad u la leit pyntbit ïalade ha Serampore College, Kolkata na ka bynta ban tip kham bha shaphang ka ktien u Blei.
La pynkyntang Pastor ïa u ha ki snem 1960. U la sdang ïa ka kam kum u Pastor ha Kolkata bad u la long kum u Pastor jong ka Union Chapel la lai snem, ha u snem 1965 u la shongkurim ïa ka Carol. Ha u snem 1970 u la pynïasoh ïalade bad ka Billy Graham Evangelistic Association bad u ïatrei ryngkat ryngkat bad u Billy Graham bad u la leit ban ïalap sha kylleng ki jaka. Hadien kane u la leit pule ïa ka Theology sha United States bad u la pyndep ïa ka Master ha u snem 1974.
U dei u nongïalap uba ki paidbah ki sngewtynnad bha ban sngap bad ha u snem 2009 ha ka jingïalap jong u ha Surat ha ka Festival of Peace ki la wan tuid da ki phew hajar ngut ki paidbah kiba wan sngap ïa u.
Naduh u snem 2010 haduh 2016 u la bat kum u President jong ka United Bible Societies bad u la shah jied kum u nongïalam ha ka UBS World Assembly kaba la long ha u snem 2010 bad u dei ruh uba nyngkong eh na Asia ban bat ïa kane ka kyrdan ka ban ïalam ïa ka UBS Global Council. U ju ïa trei ryngkat ruh bad ka Bible Society of India.
Kum u nongïalap u la wan ïalam ïa u Billy Graham sha kane ka thaiñ Shatei Lammihngi, ha u snem 2018 u la shah jied ban mihkhmat ïa ka Asia ban leit ai jingkren ha ka sngi tep ïa u Billy Graham. Kum u nongïalam jong ka Bible Society u la leit ïakynduh ïa u Pope Francis ha u snem 2023 ban ïasyllok shaphang ka Ktien u Blei.
U khun jong u Billy Graham, u Franklin Graham u la phah ka jingsngewlem halor ka jingkhlad noh jong u Pastor Cunville bad u la ong ba u dei u briew uba sngewrit bad u nongbud uba khatduh eh uba don ha syndah u kpa jong u.
U Pastor Cunville u la ïoh ïa ka jingpang kyndeh shadem lane Heart Attack. Kumta la rah wutwut ïa u sha Bethany Hospital, Shillong bad ha ka 2 tarik, Kyllalyngkot 2026, u la ïoh ban leit phai sha la ïing namarba u la kham ïoh bor.
Hynrei ha ka 5 tarik, Kyllalyngkot 2026, la wan lap biang ka jingpang Heart Attack kaba kham jur bad la rah biang sha Bethany Hospital hynrei namarba ka la kham ban jur la pynkynriah noh sha NEIGRHIMS Hospital bad dei tad haduh ka 17 tarik, Kyllalyngkot 2026 u lyoh u la wan tap ïa ka ïing ka sem ha kaba u Pastor Cunville u la khlad noh ha NEIGRHIMS Hospital ha ka rta kaba 89 snem.
