Shillong, K’lyngkot, 20: Ki Pulit ka West Jaiñtia Hills ryngkat ka jingsynran lang u Waheh Shnong bad ki dkhot ka Village Defence Party ka Shnong Demthring ha ka sngi Baar ha ka por kumba 3:00 baje mynstep ki la ïoh bat ïa ki saw ngut ki mynder Bangladeshi bad ïa kawei ka kali kaba don ïa u nombar ML04D-7339 ba la niah da u Vishal Dkhar na Dawki.
U kyrwoh ba la phah da u Superintendent of Police ka West Jaiñtia Hills u la pyntip ba ki Pulit ki la ïoh bat ïa kane ka kali hadien ba ki la kthong na Lad Demthring bad ïoh khang kdong hajan ka Sanmala Guest House, Amlarem.
Ha kane ka jingbeh thong, ki Pulit ki la ïoh bat ruh ïa ki arngut ki nong India kiba dei ki nongïalam lynti kiba la tip kyrteng kum u Meban Dkhar bad ïa ka paralok jong u ka Melari Rasmut. Ïa kine ki arngut la ïoh bat na Lad Demthring ryngkat bad ka kali kaba ki shong kaba don ïa u nombar ML04D-4739.
Ha ka jingtohkit, u Meban Dkhar u la phla ba ki dang don sa lai tylli ki kali kiba kit ïa ki mynder Bangladeshi kiba ïaid na Jowai ban leit sha Dawki. Da kane ka jingphla jong u Meban Dkhar, ki Pulit pynlong ka jingpynap shrip ha iew Amlarem.
Ha ka por kumba 3:45 baje mynstep, ki Pulit ki la ïoh bat lai tylli ki kali, kawei kaba don ïa u nombar ML05D-6424 ba la niah da u Bah Blessing Pamthied na ka shnong Jaraiñ, kawei pat kaba don ïa u nombar ML05 D-4993 ba la niah da u Bah Twel Rongngi na ka shnong Skhentalang bad sa kawei pat ka kali kaba don ïa u nombar ML05E-0640 kaba la niah da u Bah Rimi Lyngdoh na ka shnong Skhentalang.
Katkum ka jingïathuh u SP, kine ki lai tylli ki kali ki dei kiba kit ïa ki 14 ngut ki mynder Bangladeshi.
Baroh ki mynder Bangladeshi kiba la shah kem ha ki Pulit ki long 18, 2 ngut ki nong India kiba ïalam lynti, 5 ngut ki nongniah kali bad san tylli ki kali ba la ïoh kurup.
Ïa kine kiba la shah kem la rah noh sha thanat ban pynlong ïa ka jingtohkit bad ki Pulit ki la pynngat ruh hapoh ki kyndon jong ka Immigration and Foreigners Act, 2025.
