Shillong, K’lyngkot, 27: Ki nongtrei jong ki Bank kiba don hapoh ki kynhun bapher bapher ha ka sngi Baar ki la pynlong ïa ka jingïakhih ha phyllaw jong ka State Bank of India (SBI) Main Branch, Shillong bad khang khyrdep ïa ki Bank kiba don hapoh ka jylla Meghalaya.
Ïa kane ka jingïakhih ha baroh kawei ka ri India la khot pynlong da ka United Forum of Banks (UFB)
Ha ka jingïakren bad ki lad pathai khubor u State Secretary ka All India Bank Officers’ Confederation (AIBOC) Meghalaya Unit, u Bah Davis Lyngdoh u la ong, “ka jingdawa ïa ka Sorkar ka long ban ai shuti noh manla ka sngi saitjaiñ. Na ka bynta ka sngi Saitjaiñ, ngi trei tam noh ha kiwei ki sngi 40 minit. Kan ym thud ïa ki paidbah. Ki paidbah naduh kata ka por ki la lah ban wan noh sha Bank naduh ka por 9:40 baje mynstep bad ngin khang ïa ki Bank haduh 5:20 baje janmiet. Lada ngi trei tam 40 minit manla ka sngi kan ym ktah ïa ki paidbah.”
“Ki paidbah hi kin ym shah ktah namarba ka Sorkar ka la pynshlur ban leh ïa ka Digital Mode. Ha sor lei ki leh ïa ka Digital Mode. Bun ki paidbah sha nongkyndong ruh ki la nang ban leh ïa ka Digital Mode,”u la ong.
Haba pynshai ïa ka jingkhñium ki paidbah, u State Secretary ka AIBOC u la ong, “haba ki paidbah ki leit donkam sha kiwei pat ki ophis treikam haba ki khang ha ki sngi Saitjaiñ pat kim ju khñium.”
U la ong ruh ba ka Bank ka la buh ïa ki Customer Service Point (CSP) ban pynsuk ïa ki paidbah kiba long hi kum ka Bank ha kaba ki paidbah ki lah ban plie ïa ki Account ba thymmai, ban leh ïa ka KYC, ban thep pisa bad ban sei pisa.
“Ha ki jaka ba kim don ki shelm treikam jong ki Bank, ki don ki CSP bad ha ki sngi Saitjaiñ ba ki Bank ki ïoh shutiki paidbah ki lah ban leit sha ki CSP.,” u la ong.
U la ïathuh ruh ba ka jingdawa ïa ka Sorkar ban ai shuti manla ka sngi Saitjaiñ ka long na ka daw ka jingduna nongtrei ha ki Bank. “Ngi la thoh ruh sha ka Sorkar ba kan pynlong ïa ki eksamin thungkam khnang ban pyndap ruh ïa ka jingduna ki nongtrei,” u la bynrap.
