Shillong, K’lyngkot, 28: U Chairman jong ka Meghalaya Public Service Commission (MPSC) u la pan por sa katto katne sngi ban pynbeit ïa ki mat ba dang sah kiba ïadei bad ka jingdawa jong ka Khasi Students Union (KSU) ban wanrah ïa ka jingthungkam kaba khuid ba suba.
“Na ka liang u Chairman ka MPSC hadien ka jingkut noh ka jingbuh por kaba shi taiew na ka liang ka seng, u la pan por sa katto katne sngi ban pynbeit pynbiang ïa kiwei ki mat ba dang sah namar ka jingbun ki shuti ha kine ki 7 sngi,” la pyntip u kyrwoh na u Asst. Secretary cum Chairman ka Employment Monitoring Cell ka Khasi Students’ Union, u samla Reuben Najiar.
“Ka seng kan ai por sa katto katne sngi ïa ka MPSC ban pynbeit pynbiang ïa ki mat ba dang sah hynrei lada ym don ki jingkylla kiba biang ka seng kan shim ïa ki sienjam kiba kham eh pyrshah ka MPSC bad lada donkam ban pynsangeh ruh ïa ki eksamin baroh ban ym don ki jingthep tuh bad jingleh tuh katba kine ki mat ba don ha ka kaiphot kim pat treikam,” la ong u kyrwoh.
Ka KSU ka la pyntip ruh ba ka MPSC ha ka sien kaba nyngkong ka la sdang ban pyllait paidbah ïa ki marks jong ki samla kiba pas ïa ki eksamin kam hadien ka jingdawa jong ka seng ban pyntreikam ïa ka kaiphod treikam ba la bthah da ka “MPSC Reforms Committee, 2025.”
“Ka Seng ha 19 tarik, Kyllalyngkot, 2026 ka la phah dorkhas bad la maham ba ka Commission kam dei ban pynslem shuh ban pyntreikam ïa kane ka kaiphot bad ka la ai por shi taiew ïa ka MPSC ban pynbeit pynbiang halor kane ka bynta bad na ka liang ka MPSC ha 23 tarik, Kyllalyngkot, 2026 ka la pyllait paidbah ïa ki Marks jong kiba pas bad ïohkam ha ka post Sub Inspector of Statistics hapoh ka Directorate of Economics & Statistics,” la pyntip ka seng bad bynrap, “kane ka long ka sien kaba nyngkong ba ka MPSC ka pyllait paidbah ïa ki marks bad ka long kum ka sienjam kaba nyngkong sha ka jingthungkam thungjam kaba khuid.”
“Na ki mat ba don ha ka kaiphot ka MPSC ka la lah ban pynurlong ïa katto katne tylli ki mat kiba kynthup ban pynlait ïa ki Answer Key (jubab jong ki jingkylli hadien ka eksamin) bad ban ai por ban pyrshah lada don kano kano ka jingbakla, jingthaw ïa ka Grievances Cell ban ujor lada don kano kano ka jingbakla bad ha ka sien kaba nyngkong ban pyllait paidbah ïa ki Marks bad kiwei ki mat kiba rit,” la pyntip ka KSU bad ong, hynrei ka seng kam pat hun katba baroh ki mat kiba don ha ka kaiphot kim pat treikam lut.
“Katkum ka kaphot, ka MPSC kam dei ban pynmih tang ïa ki Marks jong kiba pas hynrei jong baroh ki bym shim pas ruh bad ka MPSC kam shym la leh ïa kata,” la kynthoh ka KSU.
Haba pyntip ba kiwei pat ki mat kiba ka MPSC kam pat pyntreikam ki long, “ha ki eksamin dei ban ai ïa ki Carbon Copy jong ki OMR sheet sha ki nongthoh eksamin ba kin ïoh ban tip bad ïanujor ban nym don ba leh tuh bad ki marks ka jong ki, ban pynlait paidbah ïa ka jingdon jingem (declaration of assets & liabilities) manla u snem jong baroh kiba trei ha MPSC ba kynthup naduh u Chairman, ki dkhot bad kiwei khnang ban lah ban khanglad ïa ka jingbamsap, ban pyntip ïa ki marks jong ka Personal Pnterview lada don, ban pyllait paidbah ïa ka kaiphod treikam (Annual Report) jong ka MPSC, ban don ka Annual Calendar ka ban pyntip ïa ki nongwad kam halor ki tarik Advertisement, eksamin bad Result na bynta baroh shi snem, ki jingpynkylla ha ki rukom shim interview.”
