Shillong, K’lyngkot, 28: Ka kynhun ki nongïalehkai Muay Thai kiba don shapoh ka lama jong ka Muay Thai Association of Meghalaya ba la lamkhmat da u Bah Angelus Sun kum u Coach ka la ïoh khur ïa ka kyrdan kaba ar ha ka 7th Umai National Senior Muay Thai Championship kaba la long ha Hyderabad, Telangana ba la pynïaid da ka Telangana Amateur Muay Thai Association ryngkat ka jingïatreilang bad ka WMC India.
Na kane ka rynsan ïakura, ki dkhot ka Muay Thai Association of Meghalaya ki la ïoh khur 55 tylli ki takma, kata, 27 tylli ki takma Ksiar, 17 tylli ki takma Rupa bad 11 tylli ki takma Rnong.
Ha ka jingwan phai sha la ing ryngkat bad ka nam jop ki paidbah nongshong shnong ka Dong Nongkyndang, Saiden, ki la mih sha surok bah ban pdiang burom ïa u Ujal R. Marak, uwei na ki samla ïalehkai uba la shim bynta bad ka kynhun Muay Thai uba la ïoh khur ïa ka takma Ksiar bad ka takma Rupa ha ka jingïakhun Waikru.
