Shillong, K’lyngkot, 28: Bunsien haba ngi pyrkhat ïa ki shnong ha khappud jong ka Jylla Meghalaya bad Assam ngi ju kynmaw hakhmat tang ïa ki kam ïakajia pud kaba hateng hateng ka la wanrah ïa ki jingïaumsnam kat haduh ba ki mynsiem ba luilui ki la duh ei na ki daw ki jingïakynad na ki kam ïa kajia khappud.
Hynrei ha kum kine ki shnong khappud ki don ruh ki jaka kiba itynnad bad kiba sei soh bha bad namar ka jingsahdien bad shah iehnoh bein na ka jingbym biang ka surok bad ki lynti ki syngkien kiba kum kine ki jaka ha ki shnong khappud kim ju da kham paw pyrthei.
Ka Nongmawlein, kawei na ki shnong khappud kaba don ha ka thaiñ Langpih, ka don ïa uwei u mawsiang uba la pawnam bha ha ka thaiñ Ri Muliang baroh kawei namar ka jingheh u mawsiang la kat uwei u lum bad une u mawsiang u dei uba la tip kyrteng kum u Mawksam uba la sdang ban khring ïa ki briew na kylleng ki jaka.
Najrong jong une u maw lah ban ïohi kyndiang ïa ki shnong kiba kynthup ïa ka shnong Domjaraiñ, ka shnong Tynghor, ka shnong Nongsohram Mawkhap bad ïa ki shnong kiba don ha ka thaiñ Langpih.
Ban poi sha sha u Mawksam, ngi la hap ban ïaid lyngba ïa ka surok ban leit sha ka shnong Langpih nangta sa lad noh na Iew Nongma bad ka jngai tang kumba 8 kilomitar na Iew Nongma hynrei ka surok pat ka dang dei ka surok khyndew bad kaba dang khohruh khohram.
Ngi la ïohlad ban ïakren bad u Sordar jong ka shnong Nongmawlein u Bah Spring Nonglang ha kaba u la pyntip ba ka dorbar shnong ka la pyrshang ban ïaleh katba lah ban pynitynnad ïa u maw hynrei kam lah ban leh bha namarba ka shnong kam ïoh ïa ki lad jingïarap naei naei ruh bad u la ong ruh ba la lah ban shna bad pynbha ïa ka lynti ïaid kjat ban poi sha kynjang jong u maw lyngba ka skhim 100 sngi bad lyngba ka BASIN la lah ban thung pynitynnad ruh ïa ki dieng.
Na ka liang jong u Sordar shnong u la kyrpad ïa ki bor sorkar khamtam ka tnad Jngohkai Pyrthei ba kan phai khmat lem ban pynïoh ïa ka surok kaba bha bad kiwei ki kam pynroi khnang ba kan long ka jingmyntoi ïa ki nongshong shnong bad ha ka juh kapor kan kyntiew ïa ki kam jngohkai ha ka thaiñ.
