Shillong, K’lyngkot, 29: Ka Synjuk ki Seng Samla Shnong (SSSS) Shillong City ka la phah ïa u kyrwoh kitbok kitrwiang sha baroh ki khun samla ka Bri u Hynniewtrep bad ha ka jylla hi baroh kawei kiba ïaleh ïa ki eksamin bapher bapher jong u snem 2026 naduh ka Secondary School Leaving Certificate (SSLC) bad Higher Secondary School Leaving Certificate (HSSLC) bad kiwei kiwei.
Ka SSSS lyngba u kyrwoh ba la phah da u Chairman u samla Pynshaiboklang Diengdoh ka ai mynsiem sha iwei pa iwei ki samla ba kin kiew shaphrang bad minot thop ban poi sha ka thong ha ka jingïaleh ka jong ki ha ki eksamin bad ban wanrah ruh ïa ka nam ka jaitbynriew hi baroh kawei.
“Kum ka jaitbynriew ngi donkam shisha ki samla trai ri trai muluk ban ïoh hi ban bat ïa ka kyrdan ba kham hajrong ha ki bynta bapher bapher. U Khulom Ksiar u dei ka atiar bad waitlam ba nep ban pruid dak ban im bad shngaiñ ka jaitbynriew,” la ong u kyrwoh.
“Ka Synjuk ka phai khmat ban ïohi ba ki khun samla ka jylla ba kin long ki Dongmusa ban tbeh jingshai ïa lade bad ïa ka pateng ka jaitbynriew baroh kawei. To U Blei un kyrkhu kyrdoh ïa ka jingïaid kynti ka jong phi nangne shakhmat,” la pynpaw shuh shuh u kyrwoh.
