Shillong, K’lyngkot, 29: Da kaba buh hakhmat ïa ka thong ban pynduhjait ïa u drok bad ïa ki jingdih pynbuaid, ka District Drug Disposal Committee jong ki hynniew tylli ki district ka la thang noh ïa u drok bad ïa kiwei pat ki jingdih pynbuaid kiba la ïoh kurup kiba kot haduh T. 9,10,97,778 klur ha ka pajwa jong ka Star Cement Limited, Lumshnong, ha East Jaiñtia Hills District ha ka sngi Palei.
Ha u kyrwoh ba la phah da u Superintendent of Police ka Anti Narcotic Task Force, Meghalaya la pyntip ba ha kane ka sngi la thang pynjulor ïa u drok uba khia 183.28 gram uba shongdor T. 34,83,678 lak, ki dawai kuli Yaba kiba khia 8.721 kilo kiba shongdor T. 1,48,39,500 klur, u Ganja uba khia 296.79 kilo uba shongdor 6,97,68,000 klur, ka dawai jyrhoh 2793 bilor kaba shongdor T. 27,93,000 hajar bad ki dawai kuli R-7 tablets kiba don 534 tylli kiba shongdor T. 2,13,600 lak.
U drok bad ïa ki jingdih pynbuaid ba la pynjulor ki dei kiba la ïoh kurup ha ki 58 tylli ki case kiba hap hapoh ka NDPS Act ha ki hynniew tylli ki District lyngba ka jingtrei shitom jong ki Pulit.
Ka dor die ha iew jong u drok bad ki jingdih pynbuaid ba la pynjulor la khein antad ba ki shongdor T. 9,10,97,778 klur. La thang ïa ki katkum ki kyndon aiñ bad katkumk ki kyndon ïada mariang.
Ki heh Sorkar ki la pynpaw ba ka jingpynjulor kam dei satia tang ban shu pynduh pyndam ïa ki jingdih pynbuaid hynrei ka dei ka khubor kaba khlaiñ jong ka jingkut jingmut ban pynlong ïa ka imlang sahlang kaba lait na ki jingdih buaid.
La leh ïa kane kum shi bynta ka thong jong ka Drug Reduction, Elimination and Action Mission (DREAM), Meghalaya, ïa kaba la pynbna paidbah da u Myntri Rangbah ka jylla ha u snem 2023.
Hapoh ka jingïalam jong u, ka DREAM ka la ïoh ïa ka jingïatreilang na ki paidbah, ka jingpynbha, ka jingpynsngewthuh bad ka jingïashim bynta lang jong ki paidbah.
“Ka jingpynjulor ïa shi gram u drok ka dei ka pynkynmaw ïa ka jingïada ïa ka jingim, ka jingïada ïa ki longiing longsem bad ka lawei kaba skhem,” la ong u SP ka ANTF.
