Shillong, K’lyngkot, 29: Ka Federation of Khasi Jaiñtia and Garo People (FKJGP) ka la buh hakhmat ïa ka thong mynta u snem pynlong da ka jingïakhih na ka bynta ban dawa ïa ka Sorkar Meghalaya ba ka dei ban ïapynbeit noh mardor ïa u pud u sam bad ka Sorkar Assam khnang ban loit bad law ïa ki jingeh ba la thaiñ sohkyrdot na ka jingïakajia pud.
Ha ka jingïakren bad ka Batesi Tv ha ka sngi Palei u President ka Federation of Khasi Jaiñtia and Garo People (FKJGP) Bah Dundee Cliff Khongsit u la ong ba ka Sorkar Jylla ka dei ruh ban ïakren bad ka Sorkar Pdeng ban ïapynbeit noh mardor ïa ka jingïakajia pud hapdeng ka jylla Meghalaya bad ka jylla Assam.
“Na ka liang jong ka seng, ngi la shimkhia halor kane ka mat bad kan don ka jingïakhih bad ka jingdawa kaba jur ba ka dei ban pynbeit mardor ïa ki jaka kiba ïakajia pud bad ka jylla Assam bad kumjuh ruh ka dei ban ai ïa ka jingïada kaba paka ïa ki briew jong ngi kiba sah ha ki shnong khappud bad kan ym don ka jingshong syier ïa ki,” la ïathuh u Bah Khongsit.
“Kan dei ruh ka mat kaba mynta u snem, ka seng kan ym shong kli kti hynrei ngin ïai tynruh ïa ka Sorkar ba ka dei ban pynsngew shaduh ka Sorkar India ban shimkhia ïa ki jingeh ba ki paidbah ki ïakynduh bad ngi dei ban ïoh ïa u pud u sam uba paka kum ka jylla,” u la ong.
“Ki lanot kiba mad ïa ka jingeh ki dei ki briew kiba sah ha ki jaka khappud. Dei ka jingiehbeiñ ka Sorkar Jylla ki paidbah ha khappud na ka por sha ka por ki duhei wat ïa ki mynsiem briew kumba la jia ha Mukroh, ha Langpih,” la ong u Bah Khongsit.
“Ka jingïakajia pud ka dei kaba ngi la ïatakhuh na ka por sha ka por bad ka jylla Assam, ngi ïohi hi ba ka jem shaba palat ka sorkar Meghalaya,” la kynthoh u President ka FKJGP bad bynrap, “lada ka Sorkar Meghalaya ka nud ban pynibor ïa kaei kaba ka Sorkar Assam ka wan kyntur pud, ki paradoh parasnam jong ngi kiba shong ha ki thaiñ khappud kin ym ïakynduh ïa ki jingeh.”
“Ka jingiehbein jong ka Sorkar Jylla bad ki nongïalam kiba bat ïa u lakam synshar ha kane ka jylla ki paidbah kiba sah ha khappud ki shu kylla sohpdung,” u la ong.
Haba kylli, u la ong, “ïa ka jingjia ha ka shnong Maikhuli, Ribhoi District tang shu ïoh jingtip ka seng ka la phah ïa ki dkhot ban leit ïakynduh ïa ki nongshong shnong bad ïa ki bor synshar district. Da ka jingshimkhia ka seng, ki nongshong shnong bad ki bor synshar district ka la don ka jingïasoi ïa ka soskular ba ïa ki kam pynroi ym dei ban pynthud lada ka wan na kano kano ka liang ruh.”
