Shillong, K’lyngkot, 30: Ki la don haduh 48793 ngut ki khynnah skul kiba la thoh ïa ka eksamin Secondary School Leaving Certificate ba la pynlong da ka Meghalaya Board of School Education mynta u Kyllalyngkot, 2026 bad ki don 30044 ngut ki khynnah skul kiba la thoh ïa ka eksamin Higher Secondary School Leaving Certificate, ha ka Arts Stream, Science Stream, Commerce Stream bad ha ka Vocational Stream.
Katkum ka jingai jingkheiñ da u Director ka Meghalaya Board of School Education u Bah M. Marbaniang, ki khynnah skul kiba ïakhun ïa ka eksamin Secondary School Leaving Certificate ha ka Regular-1 ki long 30151 ngut bad na kine 12310 ngut ki dei ki shynrang bad 17841 ngut ki dei ki kynthei. Ki Regular-11 ki don 16474 ngut ba kynthup ïa ki 6755 ngut ki shynrang bad 9719 ngut ki dei ki kynthei. Kiba ïakhun Private ki don 1064 ngut, kata, 570 ngut ki dei ki shynrang bad 494 ngut ki dei ki kynthei. Ki Non-regular ki don 495 ngut, kata, 301 ngut ki dei ki shynrang bad 194 ngut ki dei ki kynthei. Kiba ïakhun Improvement ki don 5 ngut bad kiba ïakhun ïa ka Compartmental ki don 604 ngut.
Katba ha ka eksamin Higher Secondary School Leaving Certificate ki don 23762 ngut kiba dei na ka Arts Stream, 3779 ngut na ka Science Stream, 2482 ngut na ka Commerce Stream bad 21 ngut ha ka Vocational Stream.
Haba khein lang ïa baroh ki khynnah kiba pule ïa ka Class-XII kiba ïakhun ïa ka eksamin Higher Secondary School Leaving Certificate ki don baroh 30044 ngut ba kynthup lang ïa ki Regular, ki Private-1 bad Private-2, ki Non-Regular, Improvement bad Compartmental.
Ki Centre thoh eksamin ha Shillong Region ki don 97 tylli bad 74 tylli ha Tura Region na ka bynta ka Secondary School Leaving Certificate, katba na ka bynta ka Higher Secondary School Leaving Certificate ki jaka thoh eksamin ki don 72 tylli ha Shillong Region bad 42 tylli ha Tura region.
