Shillong, Rymphang, 02: Ka longiing jong u Bah Wis Dhar bad ka Kong Riburom Dkhar kiba don 5 ngut ki khun kynthei bad 2 ngut ki khun shynrang ki la ïoh ka iingsah kaba thymmai ïa kaba la plie bad la kyrkhu da u Parish Priest jong ka Nongbah Parish u Fr. Lessmon Nongtdu ha ka lah Sngi U Blei.
Ka Jaiñtia Hills Development Society kaba la ïohi ïa ka jingeh ba kane ka longiing ka la ïa kynduh kumta da ka jingkyrshan ka seng KHUBLEI Germany lyngba ka jingbei pisa jong ki lai ngut ki nongïarap na ka ri Germany kiba kynthup ïa ka Josephine, ka Anna bad u Christian Szeibert la pynshna bad pynbit pynbiang ïa ka iing kaba paka da ka Jaiñtia Hills Development Society kaba long kawei na ki seng treimon sngewbha ba la pawbha ha rilum Jaiñtia.
Shuwa ban aiti ïa kane ka iing, la pynlong ïa ka jingdwai kyrkhu kyrdoh da u Fr. Lessmon Nongtdu ryngkat ka jingïadonlang u Fr. Manbha Pakem uba dei u Director jong ka JHDS, u Bah Crecentus Susngi uba dei u MDC ka Nongbah-Mihmyntdu Constituency, u Fr. David Marbaniang uba dei u Asst. Parish Priest ka Nongbah Parish, u Bah Denis Kurkalang uba dei u Coordinator ka JHDS, ki Sister bad ki nongïalam ka Balang Katholik Nongbah.
