Shillong, Rymphang, 02: Ki Pulit ka Sadar Police Station ha ka Lah Sngi Blei ki la khot hajir ïa ki arngut ki nongïalam jong ka Federation of Khasi Jaiñtia and Garo People (FKJGP) kata, ïa u President ka Nongmensong Circle u Bah Simon Myrthong bad ïa u Asst. Organising Secretary ka Mawlai Circle u Bah Gary Nelson Thangkhiew halor ka jingkynnoh ba ki ktah kti ïa uwei u nonghikai bar jylla uba hikai ha Time Coaching Centre kaba don ha Laitumkhrah, Shillong.
Ha ka jingïakren bad ki lad pathai khubor hadien ba la mih na thanat, u Chief Organising Secretary ka FKJGP Central Body u Bah Khrawkupar Nongsiej u la ïathuh hadien ba ki dkhot ka seng ki la ïoh ïa ka jingujor pyrshah ïa uwei u nonghikai bar jylla uba jrongkti ïa ki arngut ki khynnah kynthei kiba leit Coaching Class ha Time Coaching Centre, mar mar ki la leit ban tuklar bad ban dawa ïa u Director jong ka Timeline Centre ba un beh kam noh mardor.
Ha kajuh ka por u la pynpaw ïa ka jingsngew lyngngoh ba ki Pulit ki la khot hajir ïa ki dkhot jong ka seng kiba la leit ban ai jingïarap ïa ki arngut ki samla kynthei kiba shah jrong kti ha u bar jylla ha ka 14 tarik, Nailar, 2025. “Kane ka jingkhot hajir ïa kiba ïarap ki mut ban pyntieng pynsmiej ïa ki dkhot,” u la bynrap.
U la ïathuh ruh ba wat ka Dorbar Shnong Laitumkhrah ruh ka la tuklar halor kane ka jingjia hynrei kaba lyngngoh pat ka long ba ki Pulit ki khot hajir pynban ïa ki dkhot jong ka Seng kiba ïada ïa ki samla kynthei na ka jingshah jrong kti ha u bar jylla.
