Shillong, Rymphang, 02: Ki nongïalam jong ka Khasi Students Union (KSU) South West Border Circle, East Jaiñtia Hills kiba dap da ka jingsngewkhia halor ka jingpynmih ïa ka jingpynbna da ka ophis u District Medical and Health Officer (DM&HO) ka East Jaiñtia Hills District ban pynkynriah noh ïa ka jingshna ïa ka Sub-Centre na ka shnong Hingaria sha ka shnong Mynkre ha ka Lah Sngi u Blei ki la leit ban pynsngew ha u Myntri ka tnat ka Koit ka Khiah ka Sorkar Jylla u Bah Wailadmiki Shylla ban dawa ba dei ban pynneh beit ïa ka jingshna ïa ka Sub-Centre ha ka shnong Hingaria.
Ha ka jingïakren bad ki lad pathai khubor u Education Secretary ka KSU u samla A. Talang u la ïathuh ba u Myntri ka tnat ka Koit ka Khiah um don jingtip satia halor kane ka jingjia bad u la kular hakhmat ki nongïalam shnong ba un sa shong jingïalang bad u District Medical and Health Officer (DM&HO) jong ka East Jaiñtia Hills District halor kane.
U la ïathuh ruh ba ki paidbah jong ka shnong Hingaria ki dawa ïa ka Sorkar ba ka dei ban shna beit ïa ka Sub Centre ha ka shnong Hingaria namarba ki shem jingeh ban leit wad jingsumar shaduh Khliehriat namar ka jingjngai shaba palat ka leit ka wan.
Ki nongïalam jong ka Dorbar Shnong Hingaria, East Jaiñtia Hills District ha ka 30 tarik u bnai ba ladep ki la pan jingpynshai halor ka jingpynkynriah ïa ka Sub-Centre ba la mang ban shna naduh ka samoi jong u snem 2023-2024 hynrei tad haduh mynta na ka liang ka ophis u District Medical and Health Officer (DM&HO) kam shym pat pyntrei wat hadien ba ka shnong ka la ai sngewbha ïa ka jaka ban shna ïa ka Sub-centre.
Ha u kyrwoh ba la phah sha ki lad pathai khubor da u Waheh Shnong u Bah Ting Khonglah u la ïathuh ba u District Medical and Health Officer u la ïathuh ba ïa ka jingtyrwa ban tei ïa ka Sub-centre ka Sorkar ka lah pynkynriah sha kawei pat ka shnong da kaba ai daw ba ka jaka ba ka Dorbar Shnong ka la ai kam pat biang satia bad ong ruh ba ka ophis u District Medical and Health Officer kam shym la ai jingtip satia sha ka Dorbar Shnong halor kane khnang ba kan dup lah ban shim ïa ki lad ki lynti kiba pynmyntoi ïa ki nongshong shnong.
“Ka shnong ka la ai sngewbha ïa ka jaka, hynrei lada kata ka jaka ka dang rit palat u DM&HO u la dei ban ai jingtip sha ka shnong namarba ngi donkam ïa ka Sub-Centre hapoh ka shnong bad ngi don bun ki jaka ban ai sha ka Sorkar na ka bynta ka jingmyntoi jong ki paidbah,” la ong u Bah Khonglah.
Ka shnong Hingaria ka dei ka shnong kaba don ha khappud bad ka ri Bangladesh bad kaba jngai da ki spah kilometre ban poi sha ki jaka sumar bad ka jingbun briew ha kane ka shnong kam duna shuh haduh 2000 tam eiei hynrei haba phai pat ha ka liang ka koit ka khiah khamtam ha ki por ba mynshwa ki briew kim banse ban jam sha shiliang u pud ka ri India ban leit wad ïa ki jingsumar namar ha kito ki por ka lynti synkieng ruh kam pat biang ban leit shaduh Khliehriat, Jowai lane shillong.
