Shillong, Rymphang, 11: Ha kawei na ki jingjia ba sngew shyrkhei, uwei u rangbah la kynnoh ba u la shah pynïap ha la ki jong ki Kñi da kaba daiñ ïa ka met jong u katba u dang leit trei sha khlaw kaba ym da jngai na shnong.
Une u rangbah uba la shah pynïap la tip kyrteng kum u Bah Kerang Sawkmie bad kane ka la jia ha ka shong Nongthymmai, Eastern West Khasi Hills District.
Katkum ka jingïathuh jong ka kmie bad ki bahaïng, la ong ba u Bah Kerang u la leit sha khlaw naduh ka 6 tarik Rymphang, 2026 bad namarba um wan phai shuh sha la ïing wat hadien ar sngi ha ka 9 tarik Rymphang, 2026 ki la leit wad sha khlaw bad lap ïa ka jaka kaba iphylla bad kumta ki pyntip noh sha ki bahaïng bad sha ki bor synshar shnong.
Halor kane ka jingjia, ki bahaïng hasem ki la ujor noh da ka ejahar sha ki Pulit ka Mairang Police Station ha kajuh ka sngi.
Ki la ïathuh ruh ba ki Pulit ki la kem ïa ki lai ngut ki briew halor kane ka jingjia bad don napdeng jong ki, kiba la phla ha ki Pulit ba ki la pynïap bad daiñ ïa ka met u Bah Kerang Sawkmie bad hadien kata ki la bret ha kawei ka wah kaba long thwei kaba don hapoh shnong.
Ka kynhun Search and Rescue Team (SRT) kiba la ïoh jingtip halor kane ka jingjia, ha ka sngi Baar ki la hiar sha ka shnong Nongthymmai ban wad ïa ka metïap u Bah Kerang Sawkmie hadien ba ki paidbah jong ka shnong kim shym la lap satia ïa ka metïap ha ka jingïawad paidbah.
Ki Pulit bad ka kynhun Forensic Crime Scene Unit ruh ki la poi sha kane ka jaka bad pynlong ïa ka jingtohkit bad ban lum ïa ki sakhi satar.
Ki nongngam um ka kynhun SRT ki la ngam haduh arsien ha kawei ka thwei kaba dei ka jaka ba la suba ba la bret ïa ka met u Bah Kerang hynrei kim shym la lap satia ïa ka met bad ka jingwad ïa ka met u Bah kerang ka la bteng tad haduh mynta ka sngi Balang.
Tad haduh ba la pynmih ïa kane ka khubor ka kynhun SRT kam pat lah satia ïa ka met jong u Bah Kerang.
