Shillong, Rymphang, 14 : Ki paidbah ka shnong Daistong, East Jaiñtia Hills District ki la phah da ka dorkhas sha ka Sorkar India ban dawa ba dei ban pynduh pyndam ïa ka jingai jingbit ïa ka Shree Cement Private Limited ban tei ïa ka karkhana pynmih dewbilat ha ka shnong Daistong, East Jaiñtia Hills District.
U Bah Reachingson Siangshai, uwei na ki nongtrei monsngewbha ha East Jaiñtia Hills ha ka jingïakren bad ki lad pathai khubor ryngkat ka jingdonlang katto katne ki nongshong shnong ka Daistong, ha ka sngi Saitjaiñ u la ong, “ka kam ka sdang naduh ka por ba ka Dorbar Shnong ka shu rai jubor khlem da pyntip ïa ki jingïaid lynti khamtam shwa ban ai ïa ka NoC bad khlem da rai lang la ai ïa ka NoC bad ki ïalam bakla ïa ki paidbah hapoh shnong.”
“Wat ka soskular ba la ïasoi hapdeng ka Dorbar Shnong bad ka Shree Cement Private Limited ruh ym shym la pyntip sha ki paidbah. Ki leh tang katto katne ngut ki nongïalam shnong,” u la ong.
“Namarba ym don ba sngap, naduh ka 9 tarik mynta u bnai ngi la phah da ka dorkhas sha u Myntri Rangbahduh ka ri u Narendra Modi, sha u Myntri ka tnat Kam Pohing u Amit Shah, sha u Myntri ka tnat Environment, Forest and Climate Change u Bhupendra Yadav, sha u Secretary bad sha u Director General ka tnat Environment, Forest and Climate Change bad sha ka Meghalaya Human Rights Commission,” la ïathuh shuh shuh u Bah Siangshai.
U la pyntip ba tang hadien ba la phah ïa ka dorkhas sha u MP ka Shillong Constituency u Dr. Ricky A.J Syngkon u la shimkhia ban ïakren bad u Myntri ka tnat Environment, Forest and Climate Change bad ai jingthoh sha ka Ministry ban pynsangeh noh ïa ka Proceding kaba mih na ka jingpynsngew paidbah kaba la long shen.
“Ngi la ai ruh ïa ka jingthoh sha u Nongïalam ka Liang Pyrshah u Dr. Mukul Sangma,” ula ong.
Haba ïathuh bniah ïa ka jingpyrshah jong ki 250-260 ngut ki nongshong shnong ka Daistong ka long ka jingai ïa ka NoC sha ka Shree Cement Private Limited bad ka Soskular kaba tang lai laiñ khlem jingtip ki nongshong shnong.
“Nalor kita, ka jingpyrshah hi ka dei namarba ka don ka krem Liatprah bad ka krem Labit kiba la paw bha ha ka dewbah Asia. Lada ailad ïa ka Shree Cement Private Limited ban buh ïa ka karkhana ka buh jingma ïa ki dohkha ba la lap dang shen hapoh ki krem bad kawei pat ka daw ka dei ka jingpynkheiñ ïa ka Meghalaya Land Transfer Act,” la ong shuh shuh u Bah Siangshai.
“Ka don ha ka rynsan paidbah ba u trai jylla u die duh ïa ka khyndew sha u bar jylla. Ka jingkylli mynta ka long ïa ka Sorkar naduh mynno phi la die ïa ngi haba phim peit shuh ïa ka Meghalaya Land Transfer Act haba phi ailad ïa u bar jylla ban thied ïa ka khyndew na u trai jylla,” la buh jingkylli u Bah Siangshai ïa ka Sorkar Jylla.
“Ka Sorkar ka dei ban ai jubab naduh mynno phi la wanrah ïa ka jingpynkylla (ha ka aiñ) ba u bar jylla u lah ban thied ïa ka jaka hapoh ka jylla jong ngi bad lada phim pynshai ka mut ba phi ailad ïa ki bar jylla ban thied jaka katba mon,” la dawa u Bah Siangshai.
Shuh shuh u la ong ba lada ailad ïa ka Shree Cement Private Limited ban tei ïa ka karkhana kan ktah ïa ki hali bad ki pynthor jong ki nongshong shnong, kan ktah ïa ki diengsoh, kan ktah ïa ka umbam umdih bad kiwei kiwei.
U la pynkynmaw ruh ïa ka jingshah khanglad jong kiba pyrshah ban rung sha ka jingpynsngew paidbah ha kaba la shah ban rung tang ïa kiba ai jingkyrshan.
“Wat kito kiba deng mask, la ki dei ki Gang ne ki Gunda kiba wan nangno nangno ngim tip tangba ki khang lynti ïa ki trai shnong bad ïa ki paidbah kynthup ïa ki sengbhalang kiba thmu ban leit sha ka jingpynsngew paidbah,” la kynnoh u Bah Siangshai.
“Wat u Deputy Commission uba hap ban ïaid da ka kjat. U ïohi wat ïa ki briew kiba kah durkmat tangba u khlem kren eiei, kata ka mut ka don eiei sha lyndet naduh kiba don ha ka bor, naduh ka Sorkar, ki bor synshar district bad ki nongïalam shnong kiba ïalam bakla ïa ki nongshong shnong ka Daistong,” la kynnoh shuh shuh u Bah Siangshai.
U la ïathuh ba ïa mynta ki nongshong shnong kiba pyrshah kin peit shwa kaei kaba mih hadien ba ladep aiti ïa ki dorkhas ha u Dr. Mukul Sangma bad sha kiwei kiwei ki MLA ka Liang Pyrshah ban rah ïa kane ka jingdawa ha ka Dorbar Mang Tyngka ka ban sdang naduh ka Lah Sngi u Blei ka taïew ban sa wan.
