Shillong, Rymphang, 17: Ka Meghalaya Cycling Association (MCA) ha ka sngi Baar ka la pynkup burom ïa ki samla nongniah Cycle kiba la ïoh khur takma ha ka jingïakob niah Cycle kaba la tip kum ka National Mountain Bike Cycling Championships 2026, ba la pynlong da ka Cycling Federation of India (CFI) ha ka jylla Arunachal Pradesh kaba la long naduh ka 12 tarik haduh ka 15 tarik, Rymphang 2026.
Ha kane ka jingïakob ba la ïashim bynta da ki nongïakob na kylleng ka ri India ki arngut ki khlur niah saikil ba tbit ka jylla Meghalaya, kata u Taitus Ch Marak u la jop ïa ka takma Ksiar katba u Meban Aiboklang Suïam u la jop ïa ka takma Rnong.
Ïa kane ka kynhun la pdiang sngewbha ha phyllaw ka skulbah NEHU hapoh ka jingïalam jong u President ka Meghalaya Cycling Association u Bah Lening S. Bareh.
U samla Taitus Ch. Marak u la ong, “ka long kaba sngewtynnad ban ïoh ïashim bynta ha ka National Championship kaba la pynlong ha ka thaiñ Shatei Lamihngi bad ka jingjop ïa kane ka jingïakhun ka la pynkmen shuh shuh ïa nga. Kane kam dei ka sien kaba nyngkong ban ïoh takam, hynrei ka dei ka sien banyngkong ba nga ïoh ïa ka takma ksiar.”
U la ong ba un dang ïashim bynta shuh shuh ha kine ki por ki ban wan bad u la ïathuh ruh ba u la pyntbit hi da lade bad u la ïoh jingïarap na kawei ka kompeni na Delhi ban leit ïashim bynta ruh ha ka jingïakob niah Cycle ha Arunachal Pradesh bad bynrap ba u la thmu shuh shuh ban pyndep ïa ka jingpule Degree kaba dang sahteng.
U samla Meban Aiboklang Suïam, u la ïathuh ba u la ïashim bynta ha kane ka National Championship ha ka Men Elite.
U la ïathuh ruh ba u la jop bun tylli ki jingïakop kiba u la leit ïashim bynta bad dang shen u la jop ruh ïa ka jingïakop kaba la long ha ka jylla Mizoram.
U la ïathuh ruh ba u la leit ban ïashim bynta la ar sien ha ka International bad san sien ha ka National.
“Ngi dang donkam shuh shuh ïa ki jinghikai pyntbit namarba kane ka dei jingïakop ka dei kaba dang thymmai. Ngi dang donkam ban trei shitom bad ban don ki jaka kiba biang namar kumba long mynta ngi ju leit ñiah saikil ha ki khlaw bad ngi hap ban pynbiang hi ïa ki lynti kiba kin hap ban pyndonkam,” la bynrap u samla Meban Suïam.
U President ka MCA Bah Lening S. Bareh u la ong ba ki khynnah ïalehkai ki hikai hi.
U la ong ba hapoh ka National Games ki don bun ki kyrdan bad kane ka kyrdan kaba kine ki samla ki la jop ka long kaba paw bha mynta.
U la ong ruh ba ka MCA ka la pyrshang katba lah ba kane ka kyrdan ïakhun kan ïoh rung ha ka National Games namarba ka kynhun ka ïohi ba bun bha ki khynnah bad ki samla ka jylla Meghalaya ki tbit b ha ha kane ka jingïalehkai.
Shuh shuh u la ong ba ka kynhun ka la pynlong ïa ki jinghikai pyntbit bad mynta ka MCA ka dang ïaid shakhmat ban pynlong ïa ki jingai jinghikai ha ki kyrdan bapher bapher ïa ki kynthei bad ki shynrang.
U la ong ba ka pisa kaba la ïoh na ka Sorkar ka long beit thik tang na ka bynta ban pyndonkam ha ka National Games ka ban sa long ha kane ka jylla ha u snem 2027.
