Shillong, Rymphang, 21: Ka National Domestic Workers Movement, (NDWM) Meghalaya Region ryngkat bad ki heprit kiba dei ki dkhot jong ka Children Parliament ki la pynpaw ïa ka jingsngewkhia kaba khraw halor ka jingkiew sted ka jingkyrni dih drok hapdeng ki khynnah bad ki samla ha ka jylla.
Ha ka jingïalang bad ki lad pathai khubor ha Shillong Press Club, ha ka sngi Saitjaiñ iwei na ki heprit iba dei ka dkhot jong ka Children Parliament i la la kyntu ïa ki bor sorkar ba kim dei ban shu ieh bein ïa ki khynnah kiba la ngop ha ki jingkyrni kiba sniew ha surok, ha ki thanat lane ba kin shu rieh khop ha la iing na ka jinglehraiñ namar ka jingshah ibein ha ka pyrthei hynrei ki bor ba dei peit ki dei pynthikna ba kine ki khynnah ki dei ban don ha ki Rehabilitation Centre ban ïoh ïa ki lad jingsumar, ïa ka jingïasyllok bad ka jingkyrmen.
I la ong ruh ba ki sawdon sawkun jong ka skul ki dei ban long ki jaka na ka bynta ka shlem pule puthi, ym ka jaka ïew ban khaïi ïa u drok.
Ka NDWM. Meghalaya Region ka la dawa ïa ki bor sorkar ban plie ïa ki Rehabilitation Centre kiba ai jingsumar kyrpang na ka bynta ki khynnah bad ki samla kiba shah ktah ha ka jingkyrdih dih drok, da kaba ai ka jingsumar, ka jingïasyllok bad jingïarap kaba pura. Ban shim ïa ki lad jingïada kum ki sienjamk ban khanglad ïa ka jingpyndonkam, ka jingdie bad ka jingkhaïi beaiñ ïa u drok, khamtam hajan ki skul, ha ki shnong ki thaw bad ha ki jaka paidbah.
Ki nongïalam ka NDWM ki la pynpaw ruh ka jingkyrmen ba ka Sorkar bad ka imlang sahlang kin shimkhia ïa kane ka mat khnang ban ïada ïa ka lawei jong ki khynnah bad ka jylla hi baroh kawei.
Ïa ka NDWM la sdang ha u bnai Jylliew 2003 da ka jingïasyllok Missionary Sisters of Mary Help of Christians (MSMHC), Shillong Province bad ka dei ka kynhun kaba trei na ka bynta ka hok bad ka jingïada jong ki nongtrei ïing.
Ha ka 15 tarik Risaw 2005, ka kynhun ka la ïoh ïa ka jingithuh paidbah na ka Sorkar Meghalaya hapoh ka kyrteng North Eastern Regional Domestic Workers’ Welfare Trust (NERDWWT). Hadien kata, ka la pynheh ïa ki kam jong ka sha ki jylla ka thaiñ Shatei Lammihngi kum ka Mizoram, Assam, Manipur bad Nagaland.
Ka NDWM ka la seng ïa ka Child Rights Movement (CRM), kaba trei mynta ha 18 jylla ka ri India ban pynthikna ïa ka jingim, jingïada, jingroi bad jingïashim bynta jong ki khynnah.
Ha Meghalaya, ka CRM ka trei ha bun bynta jong ka East Khasi Hills khlem jingïapher jaitbynriew ne niam.
Da kaba ïohi ïa ki sap jong ki khynnah, ka NDWM ka la seng ruh ïa ka Child Parliament (CP) ka rynsan synshar paidbah ba la ïalam da ki khynnah hi. Lyngba kane ka rynsan, ki khynnah ki ïoh lad ban pynpaw ïa ki jingmut jingpyrkhat jong ki, ban hikai jingïalam bad ban ïashim bynta ha ki rai kiba ktah ïa ka jingim jong ki.
Hapoh ka CRM bad CP, la pynlong bun jait ki prokram kum ki jingïoh jingtip halor ki Hok ki Khynnah, POCSO, ka koit ka khiah, jingïada na ka jingbanbeiñ, jingïalam, exposure programme sha ki jaka kum ka NEHU Science Centre bad District Court, ryngkat ki jingïalap paidbah kum ki Street Play bad Signature Campaign pyrshah ïa ka jingdih drok.
La plie ruh ïa ki bridge school bad la ai jingïarap ïa ki khynnah kiba la sangeh skul ban leit phai sha ka jingpule.
