Shillong, Rymphang, 21: Ka Agatha K.Sangma kaba dei ka Chairperson jong ka Meghalaya State Commission for Protection of Child Rights (MSCPCR) ka la ïoh ïa ka khusnam Distinguished Public Leadership Award – Governance & Inclusive National Development ha ka TOI National CSR Summit 2026, kaba la pynlong da ka Times Foundation ha Bharat Mandapam, New Delhi.
Ïa ka khusnam la pynkup burom da u Vice President jong ka Ri India, u C. P. Radhakrishnan uba la long kum u Kongsan.
Ka khusnam ka long shibynta jong ka Foundation ha ka jingai burom ïa ki kam ba la leh ha ka jingim, kaba ithuh ïa ki nongïalam kiba ki la noh ïa u synñiang u bynhei ha ka jingshakri paidbah bad pynkhlaiñ ïa ka roi ka par jong ka ri.
Ka jingithuh ka long hadien ka jingjied kaba laitluid kaba la leh da ka Komiti wad bniah kaba kynthup ïa ki nongïalam ba rangbah na ki kam paidbah, ki karkhana, ki kam lehbha, ki jaka pule, bad ki kynhun seng.
Ka jingai jingmut ka la ithuh ïa ka jinglong nongïalam bad jingshakri paidbah ba la paw jong ka Agatha Sangma kaba la pynpaw da ka jinglong ba janai bad ka bynta ba kongsan jong ka ha kaba kyntiew ïa ka roi ka par sha ki nongkyndong, ka jingsynshar ha ka ri bad ka jingïarap kaba kynthup lang na ka thaiñ Shatei Lammihngi jong ka ri India.
La ithuh ruh ïa ka jinglong kyrpang jong ka kum ka kawei na ki Myntri ba dang khynnah tam jong ka Sorkar Pdeng bad ki jingnoh synniang jong ka kiba neh ha ka jingïakren paidbah bad ka jingpynroi ïa baroh.
Ha ki phew snem, ki jingnoh synniang jong ka Agatha Sangma ki la pynpaw ïa ka jingaiti ha ka jingsynshar kaba don ka jingkitkhlieh, ka jingpynkhlaiñ ïa ki tnat treikam, bad ka jingroi kaba ïaryngkat.
Ha kane ka sngi la sakhi lang da ki nongthaw polisi, ki nongïalam jong ki karkhana, ki dkhot jong ki kynhun seng bad ki kynrem ki lyndan kiba la wan na kylleng ka ri.
