Shillong, Rymphang, 24: Ka Kong Aihun L. Tron kaba dei ka nongthoh khubor jong ka Kot Khubor u Mawphor bad Highland Post dang shen ka la ïoh pdiang ïa ka khusnam ‘Best Journalist of Meghalaya Award’ ha ka 20th Media Excellence Awards 2026 kaba la pynlong da ka Media Federation of India ha nongbah New Delhi.
Ïa kane ka khusnam la sam da u Director General barim jong ka Indian Institute of Mass Communication u Prof. Sanjay Dwivedi, ryngkat ka jingsakhi lang u Senior Journalist u Prateek Trivedi bad Deputy Director General jong ka National Informatics Centre u Dr. LP Sharma.
Kane ka khusnam ba la ai da ka Media Federation of India ka long kum ka dak ka jingithuh ïa ka jingnoh synñiang jong kane ka nongthoh khubor ha ka imlang sahlang, la ka long ha kaba ïadei bad ka jingshakri ïa ki paidbah bad kumjuh wat ha ki kam kiba ïadei bad ka saiñ pyrthei bad kiwei kiwei.
Ha kane ka prokram la ïa don lang ruh u National President ka Federation u Arun Sharma, u General Secretary u Dharmveer Anand, u Senior Vice President u Ashish K. Singh bad kumjuh ruh ki nongthoh khubor na ki 24 tylli ki jylla.
Ka Kong Aihun ka dei kaba shong basah ha Umlyngka, Upper Shillong hynrei ka trei pat kum ka Senior Correspondent jong u Mawphor ha East Jaiñtia Hills District.
Kum ka nongthoh khubor kaba la don palat 11 snem ha ka kam shakri bad ka la don ruh ka bynta kaba khraw ban noh synniang ha ka imlang sahlang khamtam ha kaba ïadei bad ki nongshong shnong jong ka East Jaiñtia Hills District.
Shwa kane, ka Kong Aihun ka la ïoh pdiang ruh ïa ka khusnam na ka ophis u Deputy Commissioner ka East Jaiñtia Hills District, ha ka sngi rakhe ïa ka Independence Day ha u snem 2022. Ka la ïoh ruh ïa ka jingpynkup burom na ka Sonapyrdi Tourism and Economic Development Society halor ka jingnoh synñiang jong ka ban kyntiew ïa ka kam jngohkai pyrthei ha ka thaiñ.
