Shillong, Rymphang, 25: Hadien ba la ïoh jingtip ba ka don ka jingkhlong maw beaiñ da ki briew na ka jylla Assam ha ka Wah Malidor kaba dang hap hapoh u pud u sam ka jylla Meghalaya, ka Khasi Student Union (KSU) Narpuh Circle hapoh ka jingïalam u President u Bah Phanuel Tongper bad u General Secretary u Bah Yooni Muksor ki la lap hi da lade ha ka jinghiar jurip ha ka sngi Baar.
Ha u kyrwoh ba la phah sha ki lad pathai khubor ryngkat bad ki video, ka seng ka la lap ba ki don da ki spah ngut ki briew na ka jylla Assam kiba khlong maw beaiñ da kaba pyndonkam ruh da ki puhshilum bad pynkit ha ki trok sha ka jylla Assam kat haduh ba ka la pynjot shikatdei ïa ka mariang bad ïa ka Wah Malidor.
Ha kane ka sngi, ki dkhot ka seng ki la pynsangeh bad beh krad ïa ki nongkhlong maw bad ïa ki nongniah trok bad ki nongtrei kiba dei na ka jylla Assam.
Ha ka jingtohkit kaba bniah na ki nongtrei kiba don hangta, ka seng ka la pyntip ba ki la phla ba dei uwei u briew uba la tip kyrteng kum u Lisu Terang uba dei u Karbi, uba sah ha ka shnong Malidor ha Meghalaya uba la aibor ban khlong maw na ka wah Malidor.
Ka Seng ka la dawa ïa ki bor ba dei khmih jong ka JHADC, ïa ka tnat Forest & Environment ka Sorkar Jylla bad kumjuh ïa ki bor synshar District ban tuklar mardor katkum ka aiñ bad ban leh pyrshah katkum ki kyndon jong ka aiñ ïa kiba donkti halor kane ka kam.
“Haba ïakren bad Lisu Terang lyngba ka phone, u la ong ba um don ha shnong bad haba la kylli la u la ïoh jingbit bad ka Environmental Clearance nangno ban khlong maw beaiñ kumne? U la ong ba um shym la don kino kino ki kot ki sla kum ka jingai bingbit lane ka Environmental Clearance na kano kano ka tnat. Kumta ngi la phah ïa u ban sangeh ïa kane ka kam bad la maham ruh lada u dang ïai bteng ngim banse ban leh da kaba tyngeh,” la ong u kyrwoh na ka seng.
“Ha ka jingïakren shuh shuh la sngewthuh ba u (Lisu Terang) don ka jingïadei bad ki briew jong ka tnat Forest kiba dei khmih ïa kato ka jaka. Ka Seng ka lyngngoh ba mynta lah lai bnai kynthih kane ka kam beaiñ ka la ïaid katkum ka jingtip haba tohkit, hynrei ki nongtrei ka tnat Forest kaba don ïa ka Beat Office ha ka Shnong Ratachera bad Ranger Office ha Umkiang kim ïohi ïa kane kam beaiñ kaba hap hapoh u pud treikam jong ki,” la kynnoh ka KSU.
Ha kaba ïadei bad kane, ka seng ka suba jur ba ka lah ban don ka jingïadon kti lang ki briew jong ka tnat Forest bad u Lisu Terang uba pynïaid ïa kane ka kam khlongmaw beaiñ.
