Shillong, Lber, 07: U Myntri Rangbah ka jylla u Conrad K Sangma u la pynbna paidbah ba u la mang pisa T. 2 lak na ka Chief Minister’s Special Grant (CMSG) na ka bynta thei ialehkai phutbol jong ka ri India ka samla Sanfida Nongrum kaba la mihkhmat ha ka sien banyngkong eh na ka bynta ka India bad kaba la ioh thep ruh shi kol ha ka lympung ialehkai AFC Women’s Asian Cup 2026.
Haba pynbna ia kane ka khubor, u Myntri Rangbah u la ong ba ka dei ka jingithuh ka ban sah kynmaw ia kane ka samla kaba la wanrah ia ka nam ka burom ia ka jylla bad u la pynkut ia ka jingthoh da kaba ong “nang iai tyngshain Sanfida.”
Ka Sanfida Nongrum kaba la 20 snem ka rta, ka la ioh ban thep ia ka shi kol ha ka jingiakhun pyrshah ia ka kynhun ialehkai Vietnam ha ka jingiakhun kaba la long ha Perth Rectangular Stadium.
Watla ka India ka la shah rem noh ha kane ka jingiakhun hynrei ka long pat ka jingsahnam namarba ka dei ka nongialehkai ba nyngkong eh napdeng ki kynthei na kane ka jylla Meghalaya kaba la ioh ban mihkhmat ia ka India. Ha kaba sdang jong ka jingiakhun la pynshong ben ia ka hynrei la pynmih ha ka kylla miet bad ha ka minit kaba 52 ka la ioh ban pynkhih ia ka jar bad ka dei ruh ka kol ba nyngkong eh jong ka na ka bynta ka kynhun ialehkai jong ka ri.
Ka Sanfida ka la ioh jingiaroh ruh na ka Head Coach jong ka India ka Amelia Valvarde kaba dei ruh ka nongialehkai barim jong ka ri Costa Rica.
Kum ban shu pynkynmaw ba ka Sanfida ka la sdang ia ka jingialeh phutbol ha ka jylla da kaba pyniasoh bad ka Royal Wahingdoh FC ha ka rta kaba dang 6 snem. Ha ka rta kaba 12 snem ka la ioh ban mihkhmat ha ka Subroto Cup bad hadien kata ka la ioh ban mihkhmat ia ka jylla Meghalaya ha ka Sub Junior.
Ha ka rta kaba dang 15 snem ka la leit sha Bengaluru ban pyniasoh ialade bad ka Bangalore United FC, hadien ka pyniasoh bad ka Garhwal United FC bad nangne ka la shah jied ban don ha ka kynhun ialehkai jong ka ri India.
Ki paidbah ka jylla baroh ki kitbok kitrwiang ia ka samla Sanfida ba kan nang lah ban ialehkai bha ha ki jingialehkai kiba dang sah.
