Shillong, Lber, 23: Ki samla jong ka shnong Mawlong kaba hap hapoh ka Shella Constituency ha ka Lah Sngi u Blei ki la ujor sha ka Khasi Hills Autonomous District Council (KHADC) pyrshah ïa ka jingïoh thep vote jong ki bar jylla ki bym dei ki trai shnong trai muluk ha ka elekshon jied Sordar jong ka Hima Mawlong.
Ha ka jingkren bad ki lad pathai khubor hadien ka jingïakynduh ïa u Executive Member uba khmih ïa ka tnat Elaka jong ka Council, u samla Basdonal Khyllep u la ong ba ki la aiti ruh da ka jingthoh ban dawa ïa ka KHADC ba kan pynmih da ka jingbthah ïa u Sordar ka Elaka Mawlong ban pynlong ïa ka dorbar.
“Ngi la kyrpad ïa u EM i/c Elaka ba un bthah ïa u Sordar ka Elaka Mawlong ba un pynlong ïa ka dorbar khnang ba ngin ïoh ïakren halor ki jingpynlong iew ki bar jylla ha Lubia khlem ka jingtip ka Dorbar Hima,” u la bynrap.
“Um (Sordar) ju ai jingkheiñ naduh u snem 2016 hynrei katkum ka Mawlong Act u dei ban lum bad ban ai jingkheiñ shi sien shi sem bad un wanrah ïa ka kaiphod tohkit kaba ka dorbar kyrpang ha ka 3 tarik, Lber, 2020 hadien ka jingkhladnoh u Bah Lurshai Hynñiewta ka la thung bad hukum ban leh ïa ka khanasamari bad ban wad jingtip halor ka jingtei iing dewbilat da ki bar jylla bad ban pynkylla kyrteng noh ïa ki shnong kiba don hapoh ka Hima kiba la jer kyrteng da ki bar jylla sha ki kyrteng shnong Khasi,” la ong une u samla.
U la ïathuh ruh ba kum ki samla ki angnud ïa ka Elaka ban wad ïa ki lad ki lynti na ka bynta ki samla kiba la ngop ha ka jingkyrni dih drok, ban khanglad ïa ka jingdon ki riewshim kabu jong ki briew kiba riam dur bula ïalade kum ki nongthied tin jot katba kiba donkti ban tuh ïa u kwai ha ki bri jong ki nongshong shnong ka shnong Mawlong.
