Shillong, Jymmang, 07: Da ki hajar ngut ki khun ki hajar ka Hima Sohra ha ka sngi Palei ki la tur sha Ophis jong ka Khasi Hills Autonomous District Council (KHADC) bad rah ruh ïa ki lama saw ha kti ban dawa ïa ka Executive Committee ba la ïalam da ka Voice of the People Party (VPP) ban ai noh ïa ka Sanad sha u Pa’iem Maremdor Syiem, uba la shah jied kum u Syiem bapura jong ka Hima Sohra.
Ïa ki khun ki hajar ka Hima Sohra ba la lamkmat da ki Myntri, ki Bakhraw bad ki khlieh nongsynshar, la synran lang da ki Pulit katba ki dang ïaid kjat na Umshyrpi sha ophis ka Council.
Ha phyllaw, kumba shi kynta tam ki khun ki hajar ki la pyrta shla ban dawa ïa ka District Council ban ai noh mynta hi ka sngi ïa ka Sanad ha u Pa’iem Maremdor hadien ba ka Council ka la pyntud ïa kane ka kam mynta la hynriew bnai.
Hadien kane, u CEM ka KHADC u Bah W. Lyngdoh u la khot ïakren ïa ki 10 ngut ki nongmihkmat na ka Hima Sohra ryngkat ka jingsynran lang u Adviser ki Hima Khasi u Pa’iem Labourious Syiem. Hynrei ka jingïakren, kam shym la poi shano shano ruh ha kaba ki 10 ngut ki nongmihkhmat ki la ïathuh sha ki khun ki hajar kiba ïalum lymbung ha phyllaw ba ka District Council kam lah ban ai ïa ka Sanad mynta ka sngi.
U Bah Welborn Bynnud uba dei u dkhot jong Ka Kynhun Ki Khlieh Nongsynshar bad ki Riew Rangbah Hima Sohra, la ong, “ngi la wan hangne ban dawa ïa ka Sanad, hynrei kaba sngewsih ka long ba ka Executive Committee kam lah ban ai ïa ka Sanad.”
“U don u P. Syiem uba kwah ban ïaleh Syiem na ka Hima Sohra, hynrei ngi la pynshai ba u P. Syiem um dei na Sohra bad uba la shong la sah ha Mairang da ki spah snem bad ngim tip hi ruh kaei kata ka Syiem Kynthei kaba sei syiem ïa u bad ngim tip kiei kita ki Myntri kiba kyrshan ïa u nadien hynrei nangne na District Council ki pynmih shi pynmih ïa ka kyrteng u P. Syiem ba ki hap ban ai ïa ka jingbishar kaba hok jong u ruh ba u lah ne um lah ban ïaleh syiem,” la ong u Bah Bynnud.
“Ngi la ong (ha ka jingïalang) ba ha ka Hima Sohra kam don kano kano ka jingïakajia, kam don kano kano ka jingïaknieh syiem bad da kaba suk basaiñ haba ki Myntri ki la leit ban pan syiem na ka Syiem Sad napoh Sohra ka la sei beit tang ïa u Pa’iem Maremdor. Ïa u Pa’iem Maremdor la wanrah da ki Myntri sha ka Executive Committee kaba ong ki Bakhraw bad ha kata ka por la khot ïa ka dorbarbah jong ka Hima Sohra kaba la long ha ka 3 tarik, Naiwieng, 2025, ba yn pynskhem ïa u Pa’iem Maremdor. Ka Dorbar kam shym la lap ba don sa uwei pat u ban ïaleh syiem ha kata ka por bad ym don uwei pat uba biang ban long syiem ha ka Hima Sohra hynrei ngi shem bad ngi lap ba don tang u Pa’iem Maremdor Sing Syiem uba ibit ban long u Syiem jong ka Hima Sohra, bad kumta hi ka Dorbar ka la pynskhem ïa u Pa’iem Maremdor” la bynrap u Bah Bynnud.
“Hynrei naduh hynriew bnai mynshwa ba ngi la wan shane ban aiti ïa ki kot ki sla (sha KHADC), kine ki (Executive Committee KHADC) leh bym patiaw hi, i kumba kim imon ban ai Sanad ïa u Pa’iem Maremdor bad kata ka la pynlong ïa ki khun ki hajar ka Hima Sohra ban bitar bad ban wan kiew shane sha District Council,” u la ong.
“Kine ki (Executive Committee KHADC) ki long kiba eh dohnud shisha haduh katta katta bad kim shym la ai ïa ka Sanad bad ki ong ba kin sa ïa peit pat hadien.
Namar ka jingkyntait jong ka District Council ban ai ïa ka Sanad, ki nongïalam ka Kynhun Ki Khlieh Nongsynshar bad ki Riew Rangbah Hima Sohra ka la wer ïa ki khun ki hajar ban mih na District Council bad ban leit beit beit sha Mawkdok ban shim pat sa kawei ka rai kumno ban leh nangne shakhmat namar ka jingpyneh ka District Council ban ai Sanad ïa u Pa’iem Maremdor.
Katba na ka liang u Executive Member uba khmih ïa ka tnat Elaka ka KHADC u la ong, namarba u P. Syiem u la wan mih ban pyni ïa ka hok kaba u mih na ka iing syiem ka Hima Sohra kumta u don ka hok ban ïakhun ïa ka kam ïaleh syiem.
U EM u la ïai ban beit ba ka KHADC kan hap ban pynlong da ka elekshon jied Syiem ka Hima Sohra katkum ki kyndon jong ka “The United Khasi-Jaiñtia Hills Autonomous District (Appointment and Succession of Chiefs and Headmen) Act, 1959.”
U la ïathuh ruh ba ka District Council ka la bthah ïa u Acting Chief uba ka la thung mynta ban pynstet ïa ki kam jong ka Hima khnang ba ka District Council kan dup lah ban pynlong ïa ka elekshon jied syiem ka Hima Sohra.
