Shillong, Jymmang, 16: Da ka jingïapynbeit ka Elaka Nongkhlieh bad ka Shree Cement Private Limited ha ka 25 tarik, Ïaiong, 2026, la rai ban siew ïa ka bailutksan sha ki trai kiba don jaka ha u lum syrman.
Ïa kane la pyntip ha ka jingïalang ba la lum da ka Elaka Nongkhlieh ha ka sngi Saitjaiñ bad ki trai kiba don ïa ki jaka ki puta ha u Lum Syrman ka jaka ba ka Shree Cement Limted ka la thmu ban khlong ïa u mawshun.
Ha ka jingïalang la don lang u Secretary ka Elaka Nongkhlieh u Bah Fencing Bareh bad ki dkhot Executive Committee ryngkat ki Waheh shnong kiba hapoh ka Elaka bad ki trai jaka ba don jaka ha Block–I, Lum Syrman.
Haba kren sha ki lad pathai khubor, u Bah Fencing Bareh u la ong ba ka jingai jaka ïa ka Shree Cement Limited ban ban tih mawshun ka long halor ka nongrim ba ka Elaka ka khlem die duh ïa ka jaka hynrei ka shuh ai wai bad ynda la kut ka por ba la wai wai, ka jaka kan dei hi ka jong ki khun ka Elaka.
U la ong hadien ba la kut ka por ba la buh da ka Elaka, ka Elaka kan peit shwa lada ka i biang neem kan dang pynthymmai bad lada kam i biang ka Elaka ka lah ban pynduh pyndam noh ïa ka karkhana.
U la ïathuh ba ka jingïakut hapdeng ka Elaka bad ka Shree Cement ka long ban wanrah ïa ka roi ka par khnang ba ki khun ki hajar ka Elaka kin ïoh kam ïoh jam khamtam ha kane ka juk kyrduh kam.
“Shibun ki khun samla jong ka Elaka kiba pyndep ïa ki jingpule ba kham shajrong ruh ki shu shong sngi, la hap ban pyndap da ki kmie ki kpa bad dei halor kane ka nongrim ka Elaka ka pdiang ïa ka Shree Cement Private Limited ban wanrah ïa ka roi ka par bad ban ai kam ïa ki samla kiba la biang ka jingpule,” la ong u Bah Fencing.
U la ong ba ki kam suplai bad kiwei kiwei ki kam kiba ki trai ka Elaka ki lah ban trei ka Shree Cement Private Limited kan ai shwa ïa ki briew jong ka Elaka.
Na ka liang ki trai jaka, u Bah Khrehbha Sukhlaiñ u la ai khublei ïa ki nongïalam ka Elaka kiba la lah ban wanrah ïa kane ka karkhana na ka bynta ka roi ka par hapoh Elaka bad ba ki khun ki hajar jong ka Elaka kin ïohkam ïohjam.
