Shillong, Jymmang 21: Ka shnong Permadan hapoh ka jingïalam u Sordar u Bah S.W Sohlang ryngkat ki bahaïing hasem u Bah Tailin Lyngdoh Nonglait, ha ka sngi Palei ki la ujor ha u Superintendent of Police ka Eastern West Khasi Hills District bad kyntu ruh ia ki bor jong ka ain ban shimkhia ha kaba iadei bad ki jingkynthoh ha ka social media/youtube channel na u/ka briew ba la paw kyrteng ‘Philoda Basarngaid’.
Ka jingkynthoh ka dei kaba la ktah mationg ia ka shnong bad ia ka ïing hi baroh kawei halor ka jingshah pyniap u Bah Tailin Lyngdoh Nonglait ha kawei ka dukan die sha ha kaba ia ka met jong u la lap ha ka step Baar.
U Bah sohlang u la kynnoh ba ka jingkynthoh kaba khor bha ka paw ba ki dei kiba don jingtip ia ka jingjia. U la ong ka shnong bad ki bahaiing ki la kyrpad ia ki bor jong ka ain ba kin shimkhia khnang ba baroh ki jingshisha ki dei ban paw ha ka por kaba biang
Kawei na ki jingkynthoh ha ka social media kaba u Sordar ula pynsngew ka dei kaba la thoh ha ka ktien shnong kaba ong ‘ïa u bru be ïoh ïa lok ki bru te dei bin pinïap beit’ kaba mut ‘ia u briew ba ioh ia ka lok ki briew te dei ban pyniap beit’. U Bah Sohlang ula ong ba ki bor Pulit ki la shimkia ia kine ki jingkynthoh tohmet bad ki la iathuh ba kan ym shim por ban lap ruh ia kiba kynthoh tohmet.
Ha kajuh ka por u Bah Sohlang ula kyrpad ia ki briew kiba donkti ban dkhat jubor ia ka jingim u Bah Tailin kin wan ban pyndep hi noh hakhmat ka aiñ. U la iathuh ba ka jingleit mih sha ophis u Superintendent of Police ka long ruh ban ai khublei ia ka jingshimkhia jong ki Pulit halor ka jingshah pyniap u Bah Tailin.
U la pynpaw ruh ia ka jingsngewkhia halor ka jingbym don ia ka Forensic Unit ha Eastern West Khasi Hills District bad ka jingbym lah ban leh ia ka postmortem ha Civil Hospital, Mairang ha kaba la hap ban kit ia ka met sha NEIGRHIM ban pyndep ia ka postmortem kaba la ktah ia ki longiing kiba duna ka ioh ka kot.
