Shillong, Jylliew, 02: Ka Dorbar Shnong Umkiang, East Jaintia Hills District ka la pynpaw ia ka jingsngew bynniaw halor ka jingbym biang ka bording electric ha ka thain Umkiang la kumba ar haduh lai bnai naduh ba la sniew ka Sub-station kaba don ha shnong Kuliang.
Ha u kyrwoh ba la phah sha ki lad pathai khubor ha ka sngi Baar, la pyntip ba ka jingduh ka bording ka long manla ka sngi khamtam ha ka por mynmiet.
La ong ruh ba ka jingbym biang ka bording electric ha ka thain Umkiang ka la ktah haduh katta katta nalor ba ka thain Umkiang ka long kaba shit ha kine ki bnai lyiur bad nalor kata, ka ktah ruh ia ki khynnah skul kiba hap ban pyndonkam da ki mombati ha ka por ba ki khreh kot.
Halor kane ka jingeh, ki nongpyniaid shnong ki la pyntip borabor sha ki bor ba dei peit ka Meghalaya Power Distribution Corporation Limited (MePDCL) Moowakhu, East Jaintia hills District, hynrei haduh mynta kam shym la don ka jingmaramot ia ka Sub-station kaba don ha Kuliang.
Ka Dorbar Shnong Umkiang ka la kyntu ruh ia ka tnat ba kan pynbha noh mardor ia u Transformer uba don ha ka shnong Kuliang khnang ba kan long ka jingmyntoi ia ki nongshong shnong kiba sah ha ki thain khappud.
