Babu Kular Khongjirem
Hadien ka jingkhlad noh i Dr Ricky A.J Syngkon, i sitting MP na Shillong Lok Sabha Constituency, iba ki paidbah ki da ieit bad burom bha shisha ïa i bad kum u nongïalam uba don shisha ka jingkyrmen ïa ka ri bad ka jaitbynriew Khasi-Jaiñtia jong ngi, mynta pat, ka la mih ka sur wur wur- wer wer shane shatai ba ka Party VPP ne party Prah ba ki ju khot, ka la sdang hiar noh arsut ka lyer jong ka wat hapdeng ka Bye-elekshon MP ka ban sa long shen ha kine ki khyndiat bnai ki ban sa wan.
Ha ka jingshisha, kane ka samoi treikam u MP na Shillong Seat (mid term poll) ka dang dei ka pali jong ka VPP lada dei ba dang im i Dr (L) Ricky A.J Syngkon. Ka jinghiar ka lyer VPP mynta ka sien, ki ong, ym dei eh ba kim trei shitom ki nongïalam ka party, lymne ba ki ju pynap borti ne phriang jaiñ tapmoh manla ki jingïalang paidbah ban ïoh bai kynshew na ki paidbah ba wan meeting ha manla ki meeting ba ju ki ju leit pynlong, hynrei ka dei khamtam eh ha ka liang ka akor ka burom bad ba kim lah satia ban tehlakam ne synshar ïa ka ktien ka thylliej ba ki nongïalam nongpynphriang khubor paidbah jong ki (youtuber), ki ju kren man ka teng sha ki paidbah nongpeit bad nongsngap lyngba ki lad pathai khubor paidbah (social media).
Kumno ka party kaba la bun ki nonghikai ba tbit, ki riew donburom suda, kaba ju ïalap ruh ban pynkylla dur ïa ka rukom im ki briew ka ri Khasi-Jaiñtia kim lah satia ban tehlakam ïa ki nongïalam ba hakhmat jong ka ban shu phah timsih tim sang, ban shu tla shu tlep da ki ‘tien sih ‘tien sang kiba ha kiba sngap sngewbha map ïa nga), sngew kumba khlem phong sopti khlem phong patlun shuh.
Ban plie Channel ha kamra Tv khamtam haba ïa don lang ki khun ki kti, ki bahaiing hasem ne haba don lang ki khynnah skul ne samla pule la sngew lehraiñ bad jah burom hi khait ïa ka rukom kren jong ki nongïalam jong kane ka party ba ki la pynphriang lyngba ki Youtube ne Social Media jong ki. Ngi ju sneng barabor ha ing ha sem, ha lynti ha syngkien haduh ha ki jaka pule ban pyndonkam ïa ki ktien sniew ktien smeh, horkit hordang ka long kaba sang ban pyndonkam. Ban pynshlur bad ai mynsiem ïa ki ktien sniew khamtam ha ki lad khubor ba ïa sngap paidbah kam long satia kaba dei.
Ha ka jingshisha, “la duk la suk, la rit la ria kham pher, dei ban ri ban sumar bad bat kyndong ïa la ka burom”. Ka burom kaba tam ha kane ka pyrthei. Lada bakla ka burom ka akor, ka ktien ka thylliej, kata la kylla ‘riewkai ei kha-ma-kha. Lada phi nang phi stad katno katno ruh, lada phi don ka spah shi pyrthei ruh ne phi nang ban kren ki ktien kiba thiang kum ka um ngap hynrei lada phim don ka akor ka burom, phim nang ban tehlakam ïa la u thylliej kam don jingmyntoi eiei bad long lehnohei lut kita baroh.
Ha ki por ba long nongïalam ki nongsynshar mynshwa kum jong i (L) B.B Lyngdoh, (L) Capt.W A Sangma bad kiwei kwiei ki ju mai ki ju sneng ïa ki nongïalam bad ïa ki nongkyrshan jong ka party ba kim bit satia daleilei ruh ban pyndonkam ïa ki ‘tiensih ‘tien sang. Ba kin tim kin tla leilei, kata, ki la pynjah burom ym tang ïa ki kum ki nongïalam hynrei ïa ka party jong ki baroh kawei ba ki la ïalam.
Kumno da ki nongïalam party kin hikai, pynshlur bad ai mynsiem pynban ïa ki nongkyrshan ban pyndonkam da ki ktien bym man haba ïohsngew lang ki paidbah babun balang? Nangne shakhmat, ki nongïalam ba hakhmat ka party ki dei ban sneng ban kraw noh bad ai jingmut ba ka khubor tla bad tim sih tim sang dei ban pynsahngeh noh shi syndon da ki nongïalam nongpynphriang khubor jong ki ïoh ba kiwei ki party liang pyrshah jong ki kin shim kabu ban sin ne khot pynban kum ka “Party Tla” ïoh poi pynban sha ka jinghiar dor bad ka jingjah burom bad ka jingjemdaw ym tang ïa ki nongïalam hynrei shaduh ki nongkyrshan ba luilui kiba bapli hakhmat ka pyrthei baroh.
