Shillong, Jylliew, 17: Ka KSU Western Border Area Unit ryngkat ka KSU Umrit Unit ba la lamkhmat da u Education Secretary ka KSU Western Border Area Unit u Samla Shootingstar Thangkhiew bad u President ka KSU Umrit Unit u samla Stoning Mawiong ha ka sngi Balang ki la leit ha ka ingsah jong u (L) samla Paul Biswal Makri ban ai ka jingburom bad ka jingkynmaw ieid ïa une u samla ha ka jingdap 39 snem ka jingkhlad noh jong u.
Ha u kyrwoh ba la phah da ka KSU sha ki lad pathai khubor, la pyntip ba u Samla Biswal Paul Makri u dei u riewialeh jong ka KSU uba la pha ia la ka jingim na ka bynta ka jingshngain ka jaidbynriew Khasi.
U samla Paul u dei na ka shnong Umrit na Western Ri Bhoi bad la kha ia u ha u snem 1971. Ha u snem 1987 ka la don ka jingiakhih kaba jur bha ha sor Shillong ban iakhun pyrshah ia ka jingthombor ki Nepali kiba la shoh la dat ia ki samla Khasi, kiba la knieh ia ki jaka puta jong ki Khasi bad leh be-i-jot ia ki kynthei Khasi. Ia ka jingiakhih la pynlong da ka KSU hapoh ka jingialam u Bah Bull N Lyngdoh. U Paul Makri u dei u volunteer ka KSU bad ha kato ka por u la sah wai ha Jaiaw ha iing jong i (Dr.) Garod.
Ha ka 15 bad 16 tarik u Jylliew ki Pulit CRPF ki la synreit kuli pathar ia ki dkhot ka KSU bad ia ki paidbah ha kylleng ka sor Shillong ha kaba bun ngut ki la mynsaw jur. Wat hapdeng ka jingpyntieng kohtympan ki bor sorkar da ki suloi, ki dkhot ka KSU bad ki paidbah kim shym la kynran dien bad ki la iai bteng ia ka jingiakhun ha ka sngi kaba bud kata ka 17 tarik u Jylliew. Ka 17 tarik ka dei ka sngi kaba sngewsih ia ka iing ka sem jong u Biswal Paul Makri ha kaba ki Pulit CRPF ki la synreit kuli ia u bad ia kiwei ki paidbah ha kaba bun ngut ki mynsaw bad ar ngut ki la kyllon iap hajuh kynthup ia u Paul Makri.
U Iskai Makri, u paralok ba iasah lang bad u Paul Makri u la iathuh kumne: “Ka don ka jingiakhih kaba shyrkhei bha ha Mawkhar bad Motphran. Nga bad u Paul ngi leit ban iakhun pyrshah ia ki Nepali bad ki CRPF ha Motphran. Hadien kane jingiakhun kaba la neh katto katne por, ki Pulit CRPF ki la sdang ban wan da ki trok. Nga ong ia u Paul Makri ia phet noh namar kine ki CRP kin sa siat, u Paul u pyneh bad u ong pynban ngam salia ban iap na ka bynta ka ri bad ka Jaidbynriew. Hadien kane nga la ran kham shadien bad u Paul Makri u iakhun beit shakhmat. Sa kham shiphang nga leit khot biang ia u Paul hynrei u kyntait war bad ong biang ba ngam salia ban iap. Nga leit khot biang sa shisien hynrei u Paul u pyneh hi triang bad ong ba um tieng ia ka jingiap.”
U Biswal Paul Makri u la shah synreit kuli pathar ha ki Pulit CRPF haduh ba ka khlieh jong u ka la pra phum bad kyllon iap ha madan thma. Ha ryngkat u Paul, uwei u daju Khasi na ka shnong Smit u bym don bynta ha ka jingiakhih u la shah bat ha ki Pulit CRPF ha iewduh bad u la shah bom shah tied bad shah siat iap. Ha kane ka por u samla Paul u dang don ha ka rta kaba dang 16 snem. U dang don ha ki ar tylli ki jingpule, kata ka jingpule ha ka klas 9 ha Government Boys School bad ka jingpyntbit Karate ha YMCA ha ka White Belt.
Ka jingiap u Paul Makri ka la pynkyndit bynriew ia ki nongshong shnong ka Western Ri Bhoi kaba la jyllei da ki Nepali. Ki paidbah ki la mih shnong ban beh krad lut ia ki Nepali bad ka Western Ri Bhoi mynta ka la dei ka thaiñ kaba ia shong iasah tang para Khasi, la pynkut u kyrwoh na ka KSU.
