Shillong, Nailar 5 : Ka Khun Hynñiewtrep National Awakening Movement (KHNAM) ka ai jingkyrshan bha halor ka jingdawa jong ka KSU ban beh noh ïa ki briew kiba sah beaiñ ha Mahadev Kola.
“Na ka liang ka jong ngi ruh ngin phah ka jingthoh sha u Principal Chief Conservator of Forest (PCCF) bad u Myntri ka tnat Forest halor kane ka kam,” ong u Working President ka KHNAM u Bah Thomas Passah ha u kyrwoh ba la phah sha ki lad pathai khubor ha ka sngi Thohdieng.
‘Katkum ki khubor lah ïohi ba kine ki poiwir ki la leit ban pan jingbit na ka tnat forest ban ailad ïa ki ban pynlong shnong noh ïa kane ka jaka jong ka tnat Forest. Ka Sorkar kam dei ban pdiang ïa kum kane ka jingthmu bad kan long ruh kaba beaiñ lada ai namar kan long ka jingpynkheiñ ïa ka Land Transfer Act bad ïa ki aiñ khlaw jong ka Sorkar Jylla. Lada ka tnat khlaw ka ïaid shaid shaid ban weng ïa ki dukan kamai ja kpoh jong ki khasi ha ki thaiñ 7Mer kumno pat kan ailad ïa ki poiwir ban kam trai bad leh trai ïa ka khlaw,” ong u kyrwoh.
“Ka khubor kaba shai ka dei ba ka Sorkar kan hap ban leh da kaba tyngeh ïa kum kine ki jingkyntur pud jong ki poiwir,” la pynkut u kyrwoh.
