Shillong, Nailar 09 : Ka All Tamil Nadu Students’ Association (ATSA) hapoh ka jingialam u Vishnuram P (President), u Rajarajacholan (Joint Secretary), u Gideon Bala Singham (Treasurer) bad u Ragu (Advisor) ki la wan na Tamil Nadu ban iakynduh ia ki nongialam ka Khasi Students’ Union (KSU) ha Shillong ban iasyllok halor shibun ki mat kiba ktah ia ki paid trai shnong ha North East bad ha South India.
Ki nongialam ka ATSA ki la pynsngew ia ka jingeh ki paid Tamil bad kiwei ki paid Dravidian hapoh ka ri India bad kumjuh ki nongialam ka KSU ki la pynsngew ia la ki jingeh bad ki diengpynkiang ia ka Jaidbynriew Khasi.
Kine ki ar seng ki la iasyllok ruh halor ka jingshah iuhroit ki nong Northeast bad nong South India la ka dei ha ki aiñ sorkar pdeng ki bapher bapher kum ka jingpynbor ban pyndonkam ia ka ktien Hindi bad ka jingshah buhai shnong ha kiwei pat ki Jaidbynriew la ka dei ha Meghalaya lane ha Tamil Nadu. La ia kren bniah ruh kumno ban wad lad wad lynti ban iada ia ki trai ri trai muluk ha Tamil Nadu bad Meghalaya, ban kyntiew ha ka liang ka pule ka puthi bad ka ioh ka kot.
Na ka liang kine ki ar seng ki la rai ba nangne sha khmat kin iatreilang ha kaba iadei bad ki mat ki jura kiba ktah ia ka bha ka miat bad ka iap ka im ki paid trai shnong ha Northeast bad ha South India.
Ka ATSA ka la kular ruh ban iarap ia ki samla pule Khasi kiba don ha Tamil Nadu lada ki shem kano kano ka jingeh.
Ha shwa kane ka ATSA ka la ia kynduh ruh ia ki nongialam ka Naga Students’ Federation (NSF) ha Guwahati bad kine ki seng ki la shim kijuh ki rai ban iatreilang nangne sha khmat pynkut ka kyrwoh na u General Secretary ka KSU u Samla Donald V. Thabah.
