Shillong, Risaw 31: Ka long ka khubor kaba pynkyndit ia kiba bun balang ban tip ba ha ka Jylla Meghalaya ki briew kiba iap na ka jingpyndonkam ia u duma ki long haduh 8000 hajar ngut manla u snem.
Ia kane la pyntip da ka State Nodal Officer jong ka National Tobacco Control Programme (NTCP) Meghalaya ka Dr. Lana E. Lyngdoh Nongbri haba kren ha ka State Level Workshop To Implement WHO-FCTC Article 5.3 Policy in Meghalaya, India halor ka phang, ‘My Meghalaya-Tobacco free-Meghalaya.”
Ia kane ka jingiathir ban pynkynmaw jingpynkynmaw bad ban ai jingtip sha ki paitbah nongshong shnong jong ka jylla Meghalaya ha kaba iadei bad ka jingpyndonkam ia u duma la pynlong da ka PGIMER Chandigarh, kynthup ruh ka NEIGHRIM Hospital Shillong bad ka Union SEA, New Delhi ha ryngkat ka jingiatreilang bad ka National Tobacco Controll Programme (NTCP) Meghalaya.
Ka Dr. Lana ka la ong ba ka jingthmu ba hakhmat eh jong National Tobacco Control Programme ka long kumno ban pynsngewthuh ia ki paidbah nongshong shnong ba kin pynduna ia ka jingpyndonkam ia u duma.
“Ka long ruh ka khubor kaba sngewsih bad phin kyndit ban tip ba ka jingiap jong ki briew hapoh ka jylla Meghalaya na ka jingpyndonkam ia u duma ka long phra hajar ngut manla u snem,” la ong ka Dr. Lana.
Ha kane ka jingialang kaba la long ha Landmark Hotel, Shillong la iashim bynta lang da ki ophisar jong ka tnad Pulit lem bad kiwei ophisar na ki katto katne tnad treikam jong ka Sorkar Jylla.
