Shillong, Naiwieng 03: Ka Anti Ragging Committee jong ka North-Eastern Hill University (NEHU) ka la shong ia ka jingialang ha ka sngi thohdieng ka la rai ban phah da ka jingthoh sha u Director General of Police ka Jylla u Dr. LR Bishnoi, sha u Chief Secretary ka Jylla u Bah DP Wahlang bad sha u Superintendent of Police jong ka Tura ban kyntu ba kin pynstet ia ka jingtohkit halor ka jingshah thombor jong uwei u samla uba pule ha NEHU Tura Campus.
Ka Anti Ragging Committee ka la shim ia kane ka rai hadien ba ka jingshah thombor jong uwei u samla pule ka la ktah haduh katta katta ia ka pule ka puthi hapoh ka skulbah.
Ha u kyrwoh ba la phah da u Public Relations Officer ka NEHU u Dr. Davidson Pyngrope, ka Committee ka la rai ban phah ruh ia ka jingthoh sha u Campus Director jong ka NEHU Tura Campus, ban pynpaw lada ym lah ban pynithuh mardor ia kiba donkti, ka University ka lah ban shim da ki sienjam kiba tyngeh katkum ki kyndon jong ka University Grants Commission (UGC).
La rai ruh ban bthah ia ki nongpeit ia ka Hostel bad kiwei kiwei ki ophisar ba la shah pynkhamti kam kin hap ban ai ia ki jingpynshai kiba bniah halor ka jingdkoh kaba pynslem ban ujor ia ka ejahar kaba iadei bad ka jingjia.
Ka Committee ka la tyrwa ban thaw ia ka kynhun kaba saw ngut ki dkhot, kynthup ruh ia ki dkhot kiba na shabar, ban pynlong ia ka jingtohkit kaba bniah halor ka jingshah thombor jong u samla pule.
Ka University kan bishar bniah ruh halor ka jingkyrpad jong ki nongialam ka jaidbynriew Naga khnang ban ioh ia ka jingkren jong u lanot, da ka jingmynjur jong u lanot, khnang ban dup ithuh noh kham kloi ia kiba donkti.
Ka Committee ka la rai ban pynlong biang ia ka jingialang hadien ar taiew khnang ban shong bishar kam halor kane ka jingjia bad kiwei de ki kam kiba mih thymmai.
Ha ka jingialang ba la pyniaid da u Vice-Chancellor uba long ruh u Chairman jong ka Committee kala iakren sani bha halor ka jingshah thombor jong u samla pule bad halor ka jingiakynduh bad ki nongialam ka jaidbynriew Naga bad ki sengbhalang bad halor ka jingthaw ia ka Inquiry Committee da ka University ban pynlong ia ka jingtohkit halor ka jingjia.
Na ka liang jong ka Naga Elders bad ki sengbhalang kynthup ruh ka Inquiry Committee, ki ladep aiti ia ka kaiphod, hynrei haduh mynta ym pat lah satia ban ithuh ia ka durkhmat jong kito kiba donkti ban leh kam sniew.
Ha ka jingialang, u Dean of Students’ Welfare, Prof. R. L. Nongkhlaw, u la pyntip halor ka jingpyrshang jong ka University ban iakynduh ia u lanot lyngba ki bahaing hasem jong u.
“Kaba sngewsih, ki bahaing hasem ki la pynpaw ka jingbym mon ban ailad ia ki bor jong ka NEHU ban iakynduh ia u halor kane ka kam. U Proctor Dr. P. Khongji, u la pyntip shaphang ka jingleit jurip jong ka committee ia ka Tura Campus bad pyntip ruh halor ki jingtohkit ba la pynlong da ki Pulit ka Tura ia ki samla pule bad ia u Warden,” la iathuh u kyrwoh.
U Dean of Students’ Welfare u la pyntip hakhmat ka Committee ba u ladep iasyllok ha kaba iadei bad ka jingpynkynriah noh ia u samla pule sha kawei pat ka tnat pule, ia kaba ka University ka kloi ban leh mardor, hynrei na ka liang jong u lanot u la pynpaw ba um kwah shuh ban dang bteng ia ka jingpule ha kane ka samoi.
“Ka NEHU Anti-Ragging Committee kan pynthikna ia ka jingshngaiñ jong ki samla pule bad kan iai bteng ruh ban trei shitom halor kane ka jingjia. Ka University ka kyntu ia kino kino kiba don jingtip halor kane ka jingjia kin wan shakhmat khnang ba kan iarap ia ka jingtohkit,” la ong u kyrwoh.
